भुयारी मार्गासाठी ग्रामस्थांचे शोले स्टाईल आंदोलन : वाचा सविस्तर कुठल्या गावात घडला हा प्रकार
भोर : प्रतिनिधी
माणिक पवार
पुणे सातारा महामार्गावरील हरिश्चंद्री ( ता. भोर ) येथील नागरिकांना येण्या जाण्यासाठी भुयारी मार्गाच्या मागणीकडे अनेक वर्षापासून दुर्लक्ष होत असल्याने अनेकांना अपघातात जीव गमवावे लागले. भुयारी मार्ग होण्यासाठी प्रहार संघटना आणि स्थानिक तरुणांनी चक्क गावच्या पिण्याच्या टाकीवरून चढून शोले स्टाईल आंदोलन केले. सायंकाळी उशिरापर्यंत तोडगा न निघाल्याने आंदोलन सुरू होते.
पुणे सातारा महामार्गाचे रुंदीकरण होत असताना चुकीच्या ठिकाणी उड्डाणपूल आणि भुयारी मार्ग झाल्याने हरिश्चंद्र येथे भुयारी मार्गाची झाला नाही. यामुळे रस्त्याच्या पलीकडे जवळपास येथील शेतकऱ्यांनी ६५ टक्के शेती असल्याने महामार्गावरून येजा करावी लागते. भुयारीमार्ग नसल्याने झालेल्या अपघातात अनेक निष्पाप ग्रामस्थांचे बळी गेले आहे. तर काहींना कायमचे अपंगत्व आले आहे. भुयारीमार्ग होण्यासाठी प्रहार संघटनेचे भोर तालुकाध्यक्ष संतोष मोहिते, राम गाडे, राम पाचकाळे, शुभम गाडे, किशोर गाडे, पंकज गाडे, तुषार गाडे, अमित पाचकाळे, सागर घोडके, अजिंक्य पाचकाळे, लकी गाडे आदी ग्रामस्थांचा आंदोलनात सहभाग होता.
शिवसेनेच्या जिल्हा परिषद सदस्या शलाका कोंडे यांनी घटनास्थळी भेट देऊन अनुचित प्रकार टाळण्यासाठी उपस्थित प्रशासकीय अधिकाऱ्यांना याबाबत ठोस निर्णय घेण्याबाबत चर्चा केली. यावेळी एनएचआयचे उपअभियंता राकेश कोळी, अनिल गोरड, बद्रिप्रसाद शर्मा, सरपंच भारती गाडे, महिला ग्रामस्थ यांच्या उपस्थित घटनास्थळी तातडीने आलेल्या प्रांताधिकारी राजेंद्रकुमार जाधव, पोलिस निरीक्षक विनायक वेताळ यांनी आंदोलनकर्त्याना समजूत घालून आंदोलन मागे घेण्याची विनंती केली. मात्र टाकीवर चढलेल्या आंदोलकांनी भुयारी मार्ग आणि अपघातात मयत झालेल्या प्रकरणी तातडीने महामार्गाचे रुंदीकरण करणाऱ्या एनएचआय आणि संबधित ठेकेदार अधिकारी यांच्यावर गुन्हा दाखल करण्याचे पवित्रा घेतला. यावेळी पोलिस निरीक्षक विनायक वेताळ यांनी शहानिशा करून गुन्हा दाखल करण्याची हमी दिली. सायंकाळी उशिरा तोडगा न निघाल्याने आंदोलन सुरू होते.
