सोमेश्वर रिपोर्टर टीम------
मोरगाव : अष्टविनायक तीर्थक्षेत्र मोरगाव ता बारामती येथील गणेश कुंड परीसराचे गेल्या वर्षी झालेल्या अवकाळी पावसामुळे मोठे नुकसान झाले होते . नदीवरील पुलाचे सरक्षक कठडे व शेजारील भराव वाहून गेला होता. याच्या दुरुस्तीचे काम चिंचवड देवस्थान ट्रस्टच्यावतीने सुरु केले असल्याची माहीती विश्वस्त विनोद पवार यांनी दिली .
गेल्यावर्षी ऑक्टोबर महीन्यामध्ये मध्ये अवकाळी पावसामुळे कऱ्हानदी पात्राने रुद्र रुप धारण केले होते . यामध्ये नदी पात्राशेजारील अनेक शेतकऱ्यांच्या जमीनीतील माती वाहुन गेल्यामुळे आर्थिक नुकसानीला सामोरे जावे लागले होते . मोरगाव येथे गणेश कुंडाशेजारी नदीपलीकडे असणाऱ्या पवळी येथे महान साधु मोरया गोसावी जन्मस्थळ आहे . दसऱ्याला सीमोल्लंघनासाठी मयुरेश्वराचा पालखी सोहळा नदीपलीकडे जातो . नदीपात्रात असलेल्या बंधाऱ्यातील पाणी सोडून दिल्याशिवाय नदीपलीकडे जाता येत नव्हते . यामुळे सीमोल्लंघन व जन्मस्थळाकडे जाण्यासाठी मुंबई येथील गणेश भक्त अमृतेताई यांनी गणेश भक्तांसाठी लाखो रुपये खर्च करुन पुल बांधुन दिला आहे .
गतवर्षीच्या पावसामुळे या पुलाशेजारील भराव वाहुन गेला होता. तसेच पुलाचे संरक्षक कठडे , गणेश कुंड परीसराचे मोठे नुकसान झाले होते . यामुळे मोरगावचे सरपंच निलेश केदारी यांनी चिंचवड देवस्थान ट्रस्टकडे दुरुस्तीची मागणी केली होती . यानुसार देवस्थानचे मुख्य विश्वस्त मंदार देव , विनोद पवार , विश्राम देव , आनंद तांबे , राजेंद्र उमाप यांनी हा परीसर दुरुस्त करण्याचा ठराव विश्वस्त मंडळाच्या बैठकीत संमत केला होता . दुरुस्तीचे काम सध्या वेगाने सुरु आहे .
...................................................
