सोमेश्वर रिपोर्टर टीम-----
मोरगाव : घटस्थापना व नवरात्री उत्सवाच्या मुहर्तावर उद्या दि . ७ पासून हडपसर मोरगाव पिएमटी बस सेवा सुरु केली जाणार आहे . प्रायोगिक तत्वावर बसच्या दिवसभरात पाच फेऱ्या होणार असून याबाबतचे परीपत्रक पुणे महानगर परीवहन महामंडळाने काढले आहे .
मोरगाव हे अष्टविनायकापैकी प्रथम स्थान असल्याने येथे राज्यासह परराज्यातुन भावीक मयुरेश्वर दर्शनासाठी येतात .यामध्ये पुणे व मुंबई येथून येणाऱ्या भक्तांची संख्या अधीक आहे . तसेच मोरगाव हे तालुक्यातील महत्वाची बाजार पेठ असल्याने येथून पुण्याला जाणाऱ्या प्रवाशांची संख्या अधीक आहे . यांसारख्या अनेक उद्देशाने मोरगाव येथून बस सेवा सुरु केली जाणार आहे .
याबाबत ग्रामपंचायत मोरगावच्या वतीने सरपंच निलेश केदारी यांनी वेळोवेळी पत्रव्यवहार करुन उपमुख्यमंत्री अजीत पवार यांकडे पाठपुरावा केला होता . तसेच पुणे महानगर परीवहन मंडळाला चिंचवड देवस्थान ट्रस्टने पत्रव्यवहार करुन बससेवा सुरु करण्याची मागणी केली असल्याचे विश्वस्त विनोद पवार यांनी सांगितले . या सुरु होणाऱ्या बससेवेमुळे प्रवाशांमध्ये आनंदाचे वातावरण आहे .
