सोमेश्वर रिपोर्टर टीम-----
पुणे : प्रतिनिधी
राज्य निवडणूक आयोगाने जिल्ह्यातील ग्रामपंचायतीतील निधन, राजीनामा, अनर्हता किंवा अन्य कारणांमुळे रिक्त झालेल्या पदांच्या पोटनिवडणूकीचा कार्यक्रम जाहीर केला आहे. २१ डिसेंबर २०२१ रोजी मतदान तर २२ डिसेंबर २०२१ रोजी मतमोजणी होणार आहे.
नागरिकांच्या मागासवर्ग प्रवर्गाची अतिरिक्त ठरलेली रिक्त जागा सर्वसाधारण जागा म्हणून अधिसूचित करण्यासाठी पूर्वी सार्वत्रिक निवडणूकीसाठी प्रसिद्ध केलेल्या अंतिम प्रभाग रचनेच्या अधिसूचनेमध्ये २२नोव्हेंबर २०२१ (सोमवार) पर्यंत सुधारणा करण्यात येईल. तहसिलदारांनी निवडणूकीची नोटीस प्रसिद्ध करण्याचा दिनांक २२ नोव्हेंबर २०२१ (सोमवार) आहे.
उमेदवारांना नामनिर्देशनपत्रे ३० नोव्हेंबर (मंगळवार) ते ६ डिसेंबर (सोमवार) या कालावधीत आणि सकाळी ११ ते दुपारी ३ वाजेपर्यंत या वेळेत सादर करता येतील. नामनिर्देशनपत्रांची छाननी ७ डिसेंबर (मंगळवार) रोजी सकाळी ११ वाजल्यापासून होईल आणि छाननी संपेपर्यंत ही प्रक्रीया चालेल. नामनिर्देशनपत्र मागे घेण्याचा अंतिम दिनांक ९ डिसेंबर (गुरुवार) असून वेळ दुपारी ३ वाजेपर्यंत आहे. त्याच दिवशी दुपारी ३ वाजल्यानंतर निवडणूक चिन्ह नेमून देण्यात येऊन अंतिमरित्या निवडणूक लढविणाऱ्या उमेदवारांची यादी प्रसिद्ध करण्यात येईल.
मतदान २१ डिसेंबर (मंगळवार) रोजी सकाळी ७.३० ते सायंकाळी ५.३० या वेळेत राहील. मतमोजणी २२ डिसेंबर (बुधवार) रोजी जिल्हाधिकाऱ्यांच्या मान्यतेने तहसिलदार निश्चित करतील त्या ठिकाणी व वेळेनुसार होईल. जिल्हाधिकारी कार्यालयामार्फत २७ डिसेंबर २०२१ (सोमवार) पर्यंत निवडणूक निकालाची अधिसूचना प्रसिद्ध करण्यात येईल.
एकूण ३१७ ग्रामंपचायतीतील ५०३ जागांसाठी पोट निवडणूक होणार असल्याची माहिती निवासी उपजिल्हाधिकारी हिम्मत खराडे यांनी दिली आहे.
