सोमेश्वर रिपोर्टर टीम-------
मोरगाव: प्रतिनिधी
बारामती तालुक्यातील मुर्टी गावातील तरुणांनी एकत्र येऊन वृक्षारोपणासाठी सुमारे साडेतीन लाख रुपयांचा निधी उभारला . यातुन बाराशे पन्नास झाडांची लागवड व झाडांचे जनावरांपासुन संरक्षणासाठी तीनशे संरक्षक गार्ड लावले . मात्र या ट्री गार्डच्या सातत्याने चोऱ्या होत असल्याने येथील उपसरपंच किरण जगदाळे यांनी तिव्र संताप व्यक्त केला असून पोलीसांनी याबाबतचा छडा लावण्याची मागणी लेखी स्वरुपात नोंदवली आहे .
मुर्टी गावातील ग्रामपंचायत , तरुण मंडळ , युवक यांनी एकत्र येऊन वड , पिंपळ ,जांभूळ , लिंब या झाडांचे वृक्षारोपण केले . गावातील रस्ते , शाळा , बाजर तळ , मंदिर , स्मशान भूमी परीसरात ही झाडे लावली आहेत . झाडांसाठी दीड लाख रुपये तर जनावरांपासुन झाडांचे संरक्षण करण्यासाठी आणलेल्या तीनशे ट्रीगार्ड साठी दोन लाख रुपये खर्च केले आहेत . मात्र गावातील भुरट्या चोरांमुळे ग्रामस्थ व ग्रामपंचायत प्रशासन त्रस्त आहे . रात्री अंधाराचा फायदा घेत ट्री गार्डच्या चोरी अज्ञात व्यक्तीकडून केली आहे .
यामुळे येथील तरुण वर्गाकडूनही संताप व्यक्त होत आहे . येथील उपसरपंच किरण जगदाळे यांनी या चोऱ्यांबाबत राष्ट्रवादी कॉंग्रेसचे तालुकाध्यक्ष संभाजी होळकर यांकडे निवेदन दिले आहे . तसेच वडगाव निंबाळकर पोलीस स्टेशनमध्ये लेखी तक्रार देऊन या भुरट्या चोरांचा बंदोबस्त करण्याची मागणी केली आहे . दरम्यान काल वडगाव निंबाळकर पोलीस स्टेशनचे सहाय्यक पोलीस निरीक्षक सोमनाथ लांडे यांनी घटनास्थळी भेट दिली आहे .
फोटो ओळ : मुर्टी ता . बारामती येथे रस्त्याच्या बाजूस असलेल्या झाडांचे ट्री गार्ड चोरीला गेल्यामुळे गार्ड विरहीत झाड
