सोमेश्वर रिपोर्टर टीम------
बारामती : प्रतिनिधी
१६ जानेवारी २०२३ रोजी पंढरपूर येथे उघड झालेल्या दूध भेसळ प्रकरणी आतापर्यंत पंढरपूर पोलिसांनी पाच जणांना अटक केली असून दोन जण फरार आहेत. यातील बारामती तालुक्यातील वडगाव निंबाळकर येथील मास्टरमाइंड समीर मेहता याने अटकपूर्व जामिनासाठी केलेला अर्ज न्यायालयाने फेटाळला आहे.
पंढरपूर पोलिसांनी याप्रकरणी आतापर्यंत निलेश बाळासाहेब भोईटे वय ३० वर्ष रा. वृंदावन सोसायटी टाकळी, गणेश हनुमंत गाडेकर वय २५ वर्षे रा. टाकळी रोड, पंढरपूर, परमेश्वर सिद्धेश्वर काळे वय ४० वर्ष रा. फुलचिंचोली ता. पंढरपूर, शहाजी भैरू ढाळे वय ३५ वर्ष रा. दसुर ता. माळशिरस जिल्हा सोलापूर, व स्वप्निल राजेंद्र गायकवाड वय २५ वर्ष रा. वडगाव निंबाळकर, ता. बारामती जिल्हा पुणे. हे सर्व आरोपी न्यायालयीन कोठडीत आहेत, अद्याप एकाही आरोपीला जामीन झालेला नाही. तर समीर मेहतासह एक आरोपी फरार आहेत.
याबाबत सविस्तर हकीकत अशी, १६ जानेवारी २०२३ रोजी पो. हवा. नवनाथ सावंत पोलीस ठाणे पंढरपूर ग्रामीण हे पोलीस ठाणे हद्दीत रात्रगस्त करीत असताना मध्यरात्री १ वाजण्याच्या सुमारास टाटा इंट्रा, अशोक लेलँड अशी दोन संशयित वाहने नवीन वाखरी-गुरसाळे बायपास फ्लाई ओव्हर पुलाजवळ दिसून आली. त्यामधील टाटा इंट्रा टेम्पोमध्ये दूध भरण्याचे रिकामे १९ कॅन व दुसऱ्या अशोक लेलँड टेम्पोमध्ये निळ्या रंगाचे प्लास्टिकचे १४ कॅन त्या मध्ये पांढऱ्या रंगांचे लिक्विड भरलेले दिसून आले.
त्यावेळी टेम्पो जवळ असणारे निलेश बाळासाहेब भोईटे वय ३० वर्ष रा. टाकळी, परमेश्वर सिद्धेश्वर काळे वय ४० वर्ष रा. काळे मळा, फुलचिंचोली, गणेश हनुमंत गाडेकर वय २५ वर्ष रा. सुरेंद्र कुलकर्णी यांचे घरी, गणेश नर्सरी जवळ, टाकळी रोड, पद्मावती, पंढरपूर हे तिघे आढळून आले.
सदर बाबत तिघांकडे दुधाचे रिकामे कॅन व प्लास्टिकच्या कॅनमध्ये असलेले पांढरे लिक्विड याबाबत सखोल चौकशी केली असता सदरचे लिक्विड सुमित मेहता रा. वडगाव निंबाळकर ता. बारामती यांचेकडून दुधात भेसळ करण्याकरता आणलेले आहे असे सांगितलेले होते. पुढील तपास पंढरपूर पोलीस ठाण्याचे पोलीस निरीक्षक धनंजय जाधव करत आहेत.
