सोमेश्वर रिपोर्टर टीम-----
भोर : संतोष म्हस्के
भोर तालुक्याच्या पश्चिमेकडील भाटघर धरण बॅक वॉटरला असणाऱ्या वेळवंड-पांगारी खोऱ्यातील जयतपाड ता.भोर येथे मंगळवार दि .१५ स्वातंत्र्यदिनी पर्यटनासाठी आलेल्या पुण्यातील शिरीष मनोहर धर्माधिकारी वय- ४५ व ऐश्वर्या शिरीष धर्माधिकारी वय -१३ (रा.औंध पुणे) या बाप - लेकीचा धरणातील पाण्यात पोहताना बुडून दुर्दैवी मृत्यू झाल्याची घटना घडली असून सुट्टीचा दिवस बाप-लेकीसाठी कर्दनकाळ ठरला आहे.
भोर पोलिसांनी दिलेल्या माहितीनुसार स्वातंत्र्य दिनाच्या सुट्टीचे औचित्य साधून भाटघर धरणाच्या बॅक वॉटरला जयतपाड ता.भोर येथील सीमा रिसॉट येथे पुणे येथील चार कुटुंबातील १२ ते १३ पर्यटक सलग सुट्ट्या असल्याने फिरण्यासाठी आले होते.रिसॉर्टच्या मागील बाजूस बेबी पूल पाहण्यासाठी हे पर्यटक गेले असता शिरीष धर्माधिकारी पूलाकडे धरणाच्या किनाऱ्यावरून न येता धरणाच्या खोल पाण्यात उतरले व मुलगी ऐश्वर्या हिला पोहण्यासाठी बोलावून घेतले.पाच ते सहा मिनिटे पोहत असताना दोघेही पाण्यात बुडाले व दुर्दैवी मृत्यू झाला.तात्काळ स्थानिक ग्रामस्थांनी बुडालेल्या मायलेकीचा शोध घेतला मात्र मुलगी मृत अवस्थेत आढळली तर रात्री उशिरापर्यंत शिरीष यांचा मृतदेह आढळून नव्हता.बुधवार दि.१६ शिरीष यांचा भोर पोलीस अशोक खुटवड,सुशांत पिसाळ,अभय बर्गे, वर्षा भोसले,होमगार्ड समीर घोरपडे,पोलीस मित्र मुकेश गुमाणे ,दत्ता पवार तसेच एकनाथ बैलकर यांना मिळून आला.
