सोमेश्वर रिपोर्टर टीम-----
नारायणगाव : प्रतिनिधी
पुणे नाशिक महामार्गावर झालेल्या भीषण अपघातात नऊ जणांचा मृत्यू झाल्याची धक्कादायक माहिती समोर आली आहे.
पुणे नाशिक महामार्गावर नारायणगाव जवळ झालेल्या भीषण अपघातात नऊ जणांचा जागीच मृत्यू झाला आहे. मागून येणाऱ्या एका ट्रकने एका कारला धडक दिल्याने हा अपघात झाला. धक्कादायक बाब म्हणजे अपघातानंतर कार ही एका एसटी बसवर जाऊन आदळली. घटनेची माहिती मिळताच मदतकार्य सुरु करण्यात आलं असून पोलिसांनी घटनास्थळी धाव घेतली आहे.
पुणे - नाशिक महामार्गावर नारायणगाव जवळील मुक्ताई ढाब्यानजीक हा भीषण अपघात सकाळी दहाच्या सुमारास झाला. सकाळी नाशिकहून पुण्याच्या मार्गाने जाणाऱ्या एसटी बसचा नारायणगावजवळ ब्रेक फेल झाला. त्यामुळे ती एसटी बस रस्त्याच्या कडेला उभी होती. त्याचवेळी मागून प्रवासी वाहतूक करणारी एक मॅक्झिमो गाडी येत होती. त्याच्या पाठीमागून एक आयशर ट्रक भरधाव वेगाने येत होता. भरधाव आयशरने प्रवासी असलेल्या मॅक्झिमो गाडीला भीषण धडक दिली. त्यानंतर मॅक्झिमो गाडी बंद पडलेल्या एसटीवर जोरात जाऊन आदळली. या मॅक्झिमो गाडीमध्ये जवळपास १३ प्रवासी होते. त्यातील नऊ जणांचा जागीच मृत्यू झाला तर इतर प्रवासी गंभीर जखमी झाले आहेत.