सोमेश्वर रिपोर्टर टीम-----
फलटण : गणेश पवार
फलटण तालुक्यातील साखरवाडी येथे बनावट लॅबोरेटरी रिपोर्ट तयार करून खामगाव (जि. बुलढाणा) येथील वैद्यकीय तज्ज्ञ डॉ. ब्रम्हानंद टाले यांच्या नावाचा व सहीचा दुरुपयोग केल्याचा धक्कादायक प्रकार उघडकीस आला आहे. या प्रकरणी फलटण पोलिसांनी धन्वंतरी लॅबोरेटरीचा चालक विशाल नाळे (DMLT) याला अटक केली असून, साखरवाडी येथील डॉ. बी. जे. राऊत, शंकर खडसे (DMLT) व प्रतिभा साळुंके (DMLT) यांच्यावर गुन्हा दाखल करून संशयित म्हणून तपास सुरू केला आहे. या प्रकारामुळे वैद्यकीय क्षेत्रात वर्तुळ निर्माण झाले असून नागरिकांत संतापाची लाट उसळली आहे.
कशामुळे उघड झाले प्रकरण?
तक्रारदार डॉ. ब्रम्हानंद टाले हे २००५ पासून धन्वंतरी पॅथॉलॉजी लॅबोरेटरी, खामगाव येथे अधिकृत तपासण्या करून अहवाल देत आहेत. काही दिवसांपूर्वी Bullet Health Care Services For Royal Sundaram Health Insurance Company चे प्रतिनिधींनी त्यांना काही लॅब रिपोर्ट दाखवले. ते रिपोर्ट पाहता डॉ. टाले यांच्या लक्षात आले की त्यावर “Dr. B. T. Tale, MBBS MD Pathology, Reg. No. 87125” असे नाव व खोटी सही छापली आहे. प्रत्यक्षात त्यांचा नोंदणी क्रमांक 1125 असा आहे.
तपासात समोर आले की, हे अहवाल बनावट पद्धतीने तयार करून रुग्णांना व विमा कंपन्यांना देण्यात आले होते. त्यावर आरोपी विशाल नाळे (DMLT) याचे नावही छापलेले होते. या मार्गाने केवळ रुग्णांच्या आरोग्याशी खेळ झाला नाही, तर विमा कंपन्यांची मोठ्या प्रमाणावर फसवणूक करण्यात आली आहे.
वैद्यकीय कायद्याचा भंग
डॉ. टाले यांनी आपल्या तक्रारीत सर्वोच्च न्यायालयाच्या विशेष अनुमती याचिका तसेच मध्यप्रदेश उच्च न्यायालयाच्या २००३ मधील निर्णयाचा दाखला दिला आहे. या निर्णयांनुसार फक्त नोंदणीकृत पॅथॉलॉजिस्टलाच लॅबोरेटरी रिपोर्ट प्रमाणित करण्याचा कायदेशीर अधिकार आहे. DMLT पदविकाधारक व्यक्तींना अशी परवानगी नाही. त्यामुळे या संशयितांनी केलेला प्रकार हा वैद्यकीय कायद्याचा भंग असून गंभीर गुन्हा ठरतो.
पोलिसांची कारवाई व पुढील तपास
फलटण पोलिसांनी आरोपी विशाल नाळे याला गजाआड केले असून, डॉ. राऊत, शंकर खडसे व प्रतिभा साळुंके यांच्याविरुद्ध पुरावे गोळा करण्याचे काम सुरू आहे. रुग्णांची व इन्शुरन्स कंपन्यांची फसवणूक करणाऱ्या आरोपींवर कठोर कारवाई करावी, अशी मागणी नागरिक व सामाजिक संघटनांतून होत आहे.
