सोमेश्वर रिपोर्टर टीम-----
भोर : संतोष म्हस्के
राजगड सहकारी साखर कारखाना क्षेत्रात अधिक प्रमाणात ऊसाची लागवड करून भरघोस उत्पादन घ्या.लागेल ती मदत पुरवू.ऊस दराबाबत राजगड इतर कारखान्यांच्या पुढेच राहून दर देईल असे मत राजगड कारखान्याचे माजी आमदार संग्राम थोपटे यांनी अनंतराव थोपटे महाविद्यालयातील ऊस उत्पादक शेतकरी,सभासद यांच्याशी साधलेल्या संवाद बैठकीत व्यक्त केले.
यावेळी कारखान्याचे संचालक उत्तम थोपटे, सुभाष कोंढाळकर,सुधीर खोपडे, प्रभारी कार्यकारी संचालक आव्हाड, माजी संचालक विठ्ठल कुडले, प्रगतशील शेतकरी संपत थोपटे यांच्यासह ऊस उत्पादक शेतकरी शेकडोच्या संख्येने उपस्थित होते.
थोपटे पुढे म्हणाले पुढील गाळप हंगाम व्यवस्थितरित्या सुरु करण्यात येणार असून त्याकरिता ऊस लागवड महत्वाची आहे.ऊसाची माहिती,ऊसाचे बियाणे,लागणारी खते,आधुनिक तंत्रज्ञान या सर्व बाबींची माहिती देवून शेतकरी बांधवाना शेताच्या बांधावर लागेल ती मदत पुरवण्याचे नियोजन करण्यात येणार आहे.शेतकऱ्यांनी संवाद बैठकीत शेतरस्ते, वीजसमस्या,सिंचन योजना,ऊसतोडणी यंत्रणा याबद्दल सूचना मांडल्या.यावर सकारात्मक चर्चा करून योग्य नियोजन करण्यात येणार असून विभाग निहाय अधिकारी नियुक्त करून त्यांच्या माध्यमातून शेतकऱ्यांशी सवांद साधून माहिती देण्यात येईल.त्याचबरोबर येणाऱ्या समस्या सोडविण्यासाठी संचालक मंडळ प्रयत्नशील राहील असे आश्वासन दिले.तर राजगड राज्य सरकारने सहकारी साखर कारखान्याला दिलेल्या ४६७ कोटी रुपये कर्जहमी बद्दल त्यांनी मुख्यमंत्री देवेंद्र फडणवीस यांचे आभार मानले.नवीन कारखान्याच्या निर्मितीमुळे प्रतिदिन ३५०० मॅट्रिक टन गाळप क्षमता, ६० केएलपीडी डिस्टीलरी प्रकल्प, १२ मेगावॅट वीज निर्मिती, ५ टन सीएनजी गॅस निर्मिती प्रकल्प सुरु करण्यात येणार असल्यामुळे इतर कारखान्यांच्या पेक्षा आगाऊ ऊस उत्पादक शेतकऱ्यांना ऊस दर देता येणे शक्य होणार असल्याचेही कारखान्याचे चेअरमन माजी आमदार संग्राम थोपटे यांनी सांगितले.
