कोऱ्हाळे गोळीबारातील दुसऱ्या व्यक्तीचा मृत्यू
जखमी दीपक खोमणे यांची ही प्राणज्योत मावळली
सोमेश्वरनगर दि ३१
बारामती तालुक्यातील कोऱ्हाळे येथे मुलानेच गोळ्या झाडून आपल्या वडिलांचा खून केल्याची घटना घडली होती. शेतजमीन आणि संपत्तीच्या वादातून पोटच्या मुलानेच आपल्या वडिलांवर गोळ्या झाडून नंतर स्वतःवर गोळ्या घालून घेतल्या आहेत.
बारामती तालुक्यातील कोऱ्हाळे येथे मुलगा दिपक खोमणे आणि वडील धनंजय धोंडिबा खोमणे (वय-75) यांचा जमिनीचा वाद अनेक वर्षांपासून सुरू होता. अ्नेकांनी हा वाद सोडवण्यासठी मध्यस्थी केली. मात्र याला यश आलं नाही. त्यानंतर या वादाने टोक गाठलं आणि दि २९ रोजी सकाळी पोटचा मुलगा दीपक खोमणे याने आपल्या वडिलांवर रिवॉल्व्हरने गोळ्या घातल्या. त्यानंतर त्याने स्वतःवर देखील गोळ्या घालून घेतल्या. यामध्ये वडील धनंजयराव खोमणे यांचा जागीच मृत्यू झाला आहे.
मुलगा दीपक खोमणे याने स्वत:वरही गोळ्या झाडल्याने त्याच्यावर बारामती येथील खाजगी रुग्णालयात उपचार सुरू होते. त्याची प्रकृती अतिशय गंभीर असल्याचे डॉक्टरांनी सांगितले होते. त्यामुळे जमिनीच्या वादातून संपूर्ण कुटुंबच उद्धवस्त झाल्याचं दिसत आहे. दिपक खोमणे हे बारामती तालका खरेदी विक्री संघाचा माजी व्हाईस चेअरमन आणि विद्यमान सदस्य म्हणून पदावर होते.
