मुसळधार पावसाने वाणेवाडीत दोन घरे कोसळली
सोमेश्वरनगर : प्रतिनिधी
सततच्या मुसळधार पावसामुळे वाणेवाडी(ता. बारामती) येथील मोहम्मदभाई मुलाणी यांच्या जुन्या वाड्याच्या दोन खोल्या तर मळशी याठिकाणी अरुण दिनकर भोईटे यांच्या घराची भिंत कोसळली. यामध्ये मुलाणी यांचे सुमारे एक लाख रुपयांचे तर भोईटे यांचे ५० हजार रुपयांचे नुकसान झाले आहे. नुकसान झाले आहे. मुलाणी यांचे घर (दि.११) रोजी पडले तर भोईटे यांचे घराची भिंत काल (दि १४) रोजी कोसळली.
मात्र यामध्ये कोणतीही जीवितहानी झाली नसून घरातील साहित्याचे नुकसान झाले आहे. बारामतीच्या पश्चिम भागात गेल्या तीन दिवसांपासून मुसळधार पाऊस सुरू आहे. सततच्या पावसामुळे मुलाणी यांच्या वाड्याच्या भीतींना भगदाड पडले. यामध्ये मुख्य दरवाजासह, कौले, धान्य, भांडी, घरातील अन्य साहित्यांचे एक लाख रुपयांचे नुकसान झाले आहे. मुलाणी कुटुंबीय दुसऱ्या खोलीत असल्याने दुर्घटना टळली. वाणेवाडीचे तलाठी ए. डी. होळकर यांनी घटनास्थळी भेट देत पंचनामा केला. सोमेश्वरनगर परीसरात परतीच्या पावसामुळे शेतीचे मोठे नुकसान झाले असून घरांनाही धोका निर्माण झाला आहे. गेल्या वर्षीही या परीसरात संततधार पावसामुळे घरे कोसळण्याच्या घटना घडल्या होत्या. दसरा व दिवाळी सणवार तोंडावर असताना पाऊस थांबण्याचे नाव घेत नाही. अगोदरच कोरोनाने विस्कटलेली घडी बसविण्यासाठी शेतकरी जीवाचे रान करत असतानाच आता परतीच्या पावसानेही शेतकऱ्यांना अडचणीत आणले आहे. शेतकऱ्यांना मोठ्या आर्थिक अडचणीचा सामना करावा लागणार आहे. पावसाने शेतातील पिकांचे नुकसान झाले असून हातातोंडाशी आलेला घास हिरावून घेतला आहे.
COMMENTS