सोमेश्वरनगर : प्रतिनिधी
आरोग्य विभागाकडुन राज्यातील विविध लसीकरण केंद्रामार्फत लसीकरणाचा कार्यक्रम युध्दपातळीवर राबविण्यात येत आहे. राज्यातील सर्व सहकारी तसेच खाजगी साखर कारखान्यांनी लसीकरणाच्या मोहिमेमध्ये सक्रीय सहभाग नोंदविणे आवश्यक आहे.
आरोग्य विभाग तसेच स्थानिक प्रशासन यांचेशी संपर्क साधुन कारखाना परिसरामध्ये लसीकरण केंद्र सुरु करण्यासंदर्भात समन्वय करण्यात यावा, जेणेकरुन कारखाना परीसरातील नागरीकांना लस उपलब्ध करुन देणे सोयीचे होईल.
कोरोना विषाणूचा प्रादुर्भाव रोखण्याकरीता विविध उपाययोजना करण्याबाबतच्या सुचना वेळोवेळी निर्गमीत
करण्यात आलेल्या आहेत. महाराष्ट्र राज्याचे साखर आयुक्त शेखर गायकवाड यांनी काढलेल्या परिपत्रकात म्हंटले आहे की, प्रादेशिक सहसंचालक (साखर) यांना सुचित करण्यात येते की, आपल्या विभागातील साखर कारखाना परिसरामध्ये लसीकरण केंद्र सुरु करण्यासंदर्भात आरोग्य विभाग/ स्थानिक प्रशासन यांचेशी समन्वय साधावा. साखर कारखान्याकडुन जागा उपलब्धता तसेच इतर सुविधा उपलब्ध करुन देण्याच्या अनुषंगाने कार्यवाही करण्यात यावी. कारखाना प्रशासन तसेच आरोग्य विभागाच्या सहकार्याने जास्तीत जास्त लसीकरण मोहीम यशस्वी करण्यासाठी
आवश्यक ती कार्यवाही करावी.
