सोमेश्वर रिपोर्टर टीम------
करंजे (ता. बारामती) येथील ग्रामपंचायतीत झालेल्या भ्रष्टाचारप्रकरणी गेल्या सात महिन्यांपासून पाठपुरावा करूनही कोणतीही कार्यवाही होत नसल्याने येथील शिवसेनेचे कार्यकर्ते राकेश गायकवाड व त्यांच्या सहकाऱ्यांनी बारामती येथील पंचायत समिती कार्यालयात बुधवार(दि.२२) पासून धरणे आंदोलन सुरु केले आहे. गटविकास अधिकारी व बारामती शहर पोलीस यांनी गेली ७ महिन्यांपासून ग्रामपंचायत करंजे मध्ये झालेल्या गैरव्यवहार व अपहार प्रकरणी वारंवार तक्रारी देवूनही सरपंच व ग्रामसेवक यांच्यावर कारवाई होत नसल्याने हे आंदोलन सुरु केले असल्याची माहिती राकेश गायकवाड यांनी दिली.
करंजे येथील ग्रामसेवक व सरपंच यांनी शासकीय निधीचा गैरवापर व नियमांची पायामल्ली करून अपहार केला आहे. याबाबत पंचायत समिती कार्यालयाने त्यांच्यावर ताशेरे ओढले आहेत. फौजदारी गुन्हा दाखल करून अतिक्रमणाची चौकशी करण्याची मागणी गायकवाड यांनी करूनही यावर काहीही उपाययोजना होत नसल्याने धरणे आंदोलनाचा मार्ग पत्करला आहे. याठिकाणी शिवसेना तालुकप्रमुख विश्वास मांढरे, उपजिल्हा प्रमुख बाळासाहेब शिंदे, विधान सभाक्षेत्र प्रमूख निलेश मदने, युवासेना तालुका प्रमुख निखिल देवकाते, उपतालुका प्रमुख दिग्विजय जगताप, विभाग प्रमुख दीपक काशीद, पपू माने,करंजेचे माजी उपसरपंच बुवासाहेब हुंभरे करंजे गावातील तरुणांनी पाठींबा दिला.
