सोमेश्वर रिपोर्टर टीम------
लोणंद : प्रतिनिधी
लोणंद येथील व्यापाऱ्याला पुण्याच्या येरवडा जेलमधून कुख्यात गुंड परवेझ हनिफ शेख याने पत्र पाठवून ५० लाख रुपयांच्या खंडणीची मागणी केल्याचा धक्कादायक प्रकार उघडकीस आला आहे. या प्रकरणी शेख याच्याविरूद्ध लोणंद पोलिस ठाण्यात गुन्हा नोंद झाला आहे.
लोणंद येथील कुमार गॅस एजन्सीचे मालक अमित घनश्याम तापडिया यांच्या नावाने मंगळवार दिनांक २० रोजी दुपारी चार वाजता पुणे येरवडा येथील मंडल तुरूंगाधिकारी मध्यवर्ती कारागृहातून स्पीड पोस्टने पत्र आले होते. तापडिया यांनी सदर पत्र फोडून वाचल्यावर ते चंदन सेवानी यांच्या हत्याकांडामध्ये येरवडा कारागृहात कारावासात असलेल्या कुख्यात गुंड परवेझ शेख याने पाठवले असल्याचे निष्पन्न झाले.
त्या पत्राद्वारे गुंड परवेझ याने लोणंद येथील मल्हारी भंडलकर यांच्या मालकीची २७ एकर जमिनीचा (गट नंबर ४१४, एकूण किंमत ३० कोटी रूपये) अनाधिकृत व्यवहार सुरळीत करण्यासाठी ५० लाख रुपये खंडणीची मागणी परवेझ शेख याने तापडिया यांच्याकडे केली आहे. त्यानुसार तापडिया यांनी तातडीने लोणंद पोलिस ठाण्यात जाऊन गुंड परवेझ याच्याविरूद्ध खंडणीची फिर्याद दाखल केली आहे. लोणंद पोलिस ठाण्याचे पोलिस उपनिरिक्षक गणेश माने याप्रकरणी तपास करत आहेत.
COMMENTS