सोमेश्वर रिपोर्टर टीम-----
मेढा : प्रतिनिधी
मेढा नगरपंचायतीने कार्यक्षेत्रातील अन्यायकारक विकास आराखडा व वाढीव चतुर्थकर आकारणी, शास्ती कर स्थगित न करता रद्द करण्यात यावा या मागणीसाठी मेढा ग्रामस्थ व रहिवासी शेतकरी बचाव संघाच्या वतीने केलेल्या मेढा बाजारपेठ बंदच्या आवाहनाला प्रतिसाद देत व्यापार्यांनी शहरात कडकडीत बंद पाळून निषेध व्यक्त केला. दरम्यान अत्यावश्यक सेवा वगळता मेढा शहर पूर्णपणे बंद असल्याने सगळीकडे शुकशुकाट पाहायला मिळत होता.
अन्यायकारक विकासा आराखडयाबाबत बाधित शेतकरी बांधवांनी नगरपंचायतीकडे आपल्या हरकती नोंदवल्या आहेत. अन्यायकारक करवाढी बरोबरच विकास आराखडा मान्य नसल्याचे शेतकऱ्यांनी आपल्या हरकतीमध्ये नोंदवले आहे. याबाबत स्थगिती मिळाल्याचे जाहीर करण्यात आले होते. मात्र शासनदरबारी तसा कोणताही पत्रव्यवहार नगरपंचायतीकडे आला नसल्याचे नगरपंचायतीने विकास आराखड्या बाबतचे आपले काम सुरू ठेवले होते. बाधित शेतकऱ्यांनी व्यक्तिगत दाखल केलेल्या हरकतीवर म्हणणे मांडण्यासाठी दिनांक 30 व 31 मे रोजी वैयक्तिक व सार्वजनिक हरकतीच्या सोनवणीसाठी एक जून तारीख ठेवण्यात आली होती.
शेतकरी बचाव संघ ग्रामस्थ मेढा यांच्यावतीने याबाबत बैठक घेवुन मोर्चा काढण्याचा निर्णय घेण्यात आला होता. अन्यायकारक विकासाकर रद्द व्हावा, वाढीव करवाढ रद्द व्हावी या मागणीसाठी शासनाला जाग आणण्याकरता रहिवासी शेतकरी बचाव संघ व ग्रामस्थ यांच्या वतीने गुरुवारी मेढा बाजार बंदची हाक देण्यात आली याला सर्व व्यापारी ग्रामस्थांनी बाजारपेठ बंद ठेऊन उस्फुर्त प्रतिसाद देत कडकडीत बंद पाळून आपला निषेध व्यक्त केला.
COMMENTS