सोमेश्वर रिपोर्टर टीम------
सोमेश्वरनगर : प्रतिनिधी
सोमेश्वर कारखान्याच्या वतीने वाघळवाडीतील वनविभागातील जागेत झाडांना पाणी देण्यासाठी बांधण्यात येणाऱ्या शेततळ्याचे भूमीपूजन चेअरमन पुरुषोत्तम जगताप यांच्या हस्ते पार पडले.
वाघळवाडी येथे उभारण्यात येत असलेल्या ‘नक्षत्र वन’ या वन उद्यानच्या ठिकाणी झाडांच्या करिता कायमस्वरुपी पाण्याची व्यवस्था व्हावी. यासाठी २० लाख लिटर क्षमतेचे शेततळे सोमेश्वर कारखान्या माध्यमातून बांधण्यात येत आहे.त्याच्या कामाचा भूमीपूजन कार्यक्रम पार पडला. यावेळी सोमेश्वर कारखान्याचे ज्येष्ठ संचालक राजवर्धन शिंदे, वाघळवाडीचे सरपंच हेमंत गायकवाड, उपसरपंच गणेश जाधव, वनरक्षक माया काळे, सिव्हिल इंजिनिअर धनंजय होळकर, सदस्य अनिल शिंदे, तुषार सकुंडे, शिवाजी काकडे,नंदकुमार गायकवाड,गणेश शिंदे उपस्थित होते.
सोमेश्वर कारखान्याच्या माध्यमातून या ठिकाणी करण्यात येणाऱ्या शेततळ्यामुळे वृक्षारोपणासाठी पाण्याची व्यवस्था होणार आहे.तसेच पहिल्या टप्प्यात ७० एकरावर सर्व झाडांना ठिबक द्वारे पाणी देणार असून त्याचेही काम लवकरच सुरु करत आहोत. बंदिस्त पाण्याच्या पाईप लाईनचे काम सुद्धा पूर्ण केले आहे.यामुळे हा संपूर्ण परिसर हिरवागार होईल. वृक्षारोपण आणि ‘नक्षत्र वन’ या वनउद्यान निर्मितीमुळे या भागात निसर्गरम्य ठिकाण नागरिकांना पहाण्यास मिळणार असुन उद्यान निर्मितीसाठी आवश्यक ती मदत करणार असल्याचे चेअरमन पुरुषोत्तम जगताप यांनी सांगितले.
सरपंच हेमंत गायकवाड म्हणाले की, या ठिकाणी ‘नक्षत्र वनाचे’ काम लवकर सुरू होणार असून त्या करिता राज्याचे उपमुख्यमंत्री अजितदादा पवार यांनी दीड कोटीचा निधी उपलब्ध करून दिला आहे. सोमेश्वर कारखान्याने कायमस्वरूपी मुबलक पाणी उपलब्ध करून दिले,पाईप लाईन केली,सर्व झाडांना ठिबक आणि शेततळे करुन देत आहेत.पर्यावरण समृद्ध करण्यासाठी केलेल्या मदती बाबत सोमेश्वर कारखान्याचे आभारी आहोत.
