Cyclone Fengal : चक्रीवादळाचा हाहाकार : तीन जणांचा मृत्यू, अनेक भागात शिरले पाणी, मदतकार्यासाठी लष्कराला पाचारण

Admin
सोमेश्वर रिपोर्टर टीम-----
 तामिळनाडू आणि पुद्दुचेरी या किनारपट्टी भागातील राज्यांना फेंगल चक्रीवादळाचा तडाखा बसला. चक्रीवादळ जमिनीवर आल्यानंतर अनेक भागात वेगवान वारे आणि मुसळधार पाऊस झाला.
       चक्रीवादळामुळे तीन जणांचा मृत्यू झाला असून, पाण्यात अडकलेल्या नागरिकांना बाहेर काढून सुरक्षित स्थळी हलवण्यासाठी एनडीआरएफ बरोबरच लष्करालाही पाचारण करण्यात आले आहे. बंगालच्या खाडीत निर्माण झालेले फेंगल चक्रीवादळ किनारपट्टीवर धडकल्यानंतर तामिळनाडू आणि पुद्दुचेरीमध्ये जोरदार पाऊस झाला. राज्यातील अनेक भागात अतिमुसळधार पावसामुळे रस्ते पाण्याखाली गेले.
       वादळी वारे आणि अतिमुसळधार पावसामुळे बस, रेल्वे आणि हवाई वाहतूक विस्कळीत झाली. तामिळनाडूच्या किनारपट्टी भागात, तसेच पुद्दुचेरीच्या अडगळीच्या भागात राहणाऱ्या लोकांना बाहेर काढले जात असून, सुरक्षित स्थळी हलवण्यात येत आहे.
       भारतीय लष्कराचे जवान बचाव व मदत मोहिमेत सहभागी झाले असून, शनिवारी मध्यरात्रीपासून युद्धपातळीवर मदतकार्य केले जात आहे. पुद्दुचेरीतील कृष्णानगर भागात ५०० घरांमध्ये नागरिक अडकले होते. त्यांना सुरक्षितपणे बाहेर काढण्यासाठी मदत मोहीम राबवण्यात आली.
To Top