सोमेश्वर रिपोर्टर टीम-----
भोर : संतोष म्हस्के
उन्हाचा तडाख्याने उष्णतेत भयंकर वाढ झाली असताना नागरिक तसेच बच्चे कंपनी सध्या वॉटर पार्क किंवा विहिरींवर पोहोचण्यासाठी गर्दी करू लागल्यास आहेत.मात्र हाच आनंद एका २८ वर्षीय तरुणीच्या जीवावर बेतला आहे. पुणे-सातारा महामार्गावरील राजगड वॉटर पार्क ता.भोर रिसॉर्टमध्ये हि घटना शुक्रवार दि.१८ रोजी घडली.
तब्बल ३० फूट उंचीवरून कोसळून २८ वर्षीय तरुणीचा मृत्यू झाला.तरल अरूण आटपाळकर असे मृत्यू तरुणीचे नाव असून याबाबत नंदकिशोर श्रीपती आटपाळकर (वय -५० वर्ष, दोघेही रा. सेलेशिया पार्क, नऱ्हे(धायरी), पुणे) यांनी राजगड पोलीस ठाण्यात फिर्याद दिली. राजगड पोलिसांनी दिलेल्या माहितीनुसार, २८ वर्षीय तरल आटपाळकर ही तरुणी आपल्या कुटुंबियांसोबत शुक्रवार दि.१८ सकाळी पुणे-सातारा महामार्गावरील वरवे खुर्द ता. भोर येथील राजगड वॉटर पार्क रिसॉर्ट येथे फिरण्यासाठी गेली होते. दुपारच्या सुमारास ते रिसॉर्ट मध्ये पोहोचले. सायंकाळी साडे पाच वाजण्याच्या सुमारास तरल ही झिपलाइनिंग करण्यासाठी गेली. झिपलाइनिंग म्हणजे काय? तर एका विशिष्ट उंचीवर ज्यात दोऱ्याच्या साहाय्याने एका उंचीवरून दुसऱ्या उंचीवर सरकत स्लाइड करत जाणे असते.झिपलाइन रोपवरून चालत जात असताना सुरक्षा दोर ही वरच्या रेलींगला लावण्यासाठी पुरत नसल्याने तरल ही लोखंडी स्टुलवर उभी राहीली.परंतु सदरचा स्टुल हालल्याने तिचा तोल जावुन ती साइडच्या रेलींगवर पडली.तेथून ती तब्बल ३० फुट खाली जमीनीवर कोसळली. यानंतर तरुणीला उपचारासाठी नसरापूर(ता. भोर) येथील सिद्धिविनायक हॉस्पिटल येथे उपचारासाठी आणण्यात आले.परंतु डॉक्टरांनी तिला उपचारापूर्वीच मयत घोषित केले.घटनेची माहिती मिळताच राजगड पोलिसांनी मृतदेह ताब्यात घेऊन भोर येथील उपजिल्हा रुग्णालयात पाठवला. पुढील तपास राजगड पोलीस निरीक्षक राजेश गवळी यांच्या मार्गदर्शनाखाली हवालदार तुकाराम राठोड करीत आहेत.
-------------------
राजगड वॉटर पार्कच्या सुरक्षिततेचा प्रश्न ऐरणीवर
राजगड वॉटर पार्कवर निष्काळजीपणाचे आरोप
ही दुर्घटना घडल्यानंतर राजगड वॉटर पार्कमध्ये लोकांच्या आयुष्याशी खेळ खेळला जातोय का? या घटनेसाठी जबाबदार असणाऱ्या घटकांची माहिती तरुणीला का देण्यात आली नाही? सुरक्षिततेच्या दृष्टीने संबंधित जागेवर उपाययोजना का केल्या गेल्या नाहीत? या निमित्ताने राजगड वॉटर पार्कमधील सुरक्षा व्यवस्था आणि निष्काळजीपणावर प्रश्नचिन्ह उपस्थित झाले असून राजगड वॉटरपार्क मालकावर व चालकावर सदोष मनुष्यवधाचा गुन्हा दाखल करण्याची मागणी स्थानिकांनी केली आहे.
