सोमेश्वर रिपोर्टर टीम-----
खंडाळा : मोहित देवधर
पुणे-बंगळुरू महामार्गावरील पारगाव खंडाळा येथे रविवारी मध्यरात्री झालेल्या दोन विचित्र अपघातात 3 चारचाकी वाहनांचा चक्काचूर झाला.
यामध्ये पुण्याहून साताऱ्याच्या दिशेने जाणाऱ्या मार्गावर एका ट्रकला पाठीमागून येणाऱ्या चारचाकी (क्र.एमएच.14 ईवाय.6878) वाहनाने जोराची धडक दिली. या धडकेमध्ये चारचाकी वाहनाचा पूर्णपणे चक्काचूर होत चालक गंभीर जखमी झाला. या अपघातामुळे पुणे बाजूकडून येणारी महामार्गावरील वाहतूक काही काळासाठी ठप्प झाली होती. दरम्यान, या अपघातामुळे झालेल्या वाहतूक कोंडीमध्ये थांबलेल्या आणखी एका चारचाकी वाहनाला (क्र.एमएच12 एलपी7026) पाठीमागून भरधाव वेगात आलेल्या वाहनाने (क्र.एमएच.11बीव्ही 6933) जोरदार धडक दिली. या धडकेतही समोरील वाहनातील एक जण जखमी झाले व दोन्ही वाहनांचा चुराडा झाला.
या अपघाताची माहिती कळताच खंडाळा पोलीस स्टेशनचे सहाय्यक पोलीस फौजदार राजू अहिरराव, पोलीस चालक दिग्विजय पोळ व शिरवळ रेस्क्यू टीम तात्काळ घटनास्थळी दाखल झाली व जखमींना रुग्णवाहिकेतून रुग्णालयात दाखल करण्यात आले. सर्व अपघातग्रस्त वाहने पोलिसांनी बाजूला काढत वाहतूक सुरळीत करण्यात आली. या घटनेची नोंद करण्याचे काम खंडाळा पोलीस स्टेशनला रात्री उशिरापर्यंत सुरू होते.
हा परिसर ठरतोय मृत्यूचा सापळा
केसुर्डी फाटा ते खंडाळा परिसरात वारंवार अपघात होत आहेत. या ठिकाणी लाईटची सोय नसल्याने महामार्गावर पूर्णपणे काळोख पसरलेला असतो. अशातच रस्त्याचा अंदाज न आल्याने कित्येक अपघातांमध्ये अनेकांनी आजपर्यंत जीव गमावले असून महामार्ग प्रशासनाने या ठिकाणी लाईट उपलब्ध करावी अशी मागणी ग्रामस्थांमधून होत आहे.
