सोमेश्वर रिपोर्टर टीम------
लोणंद : प्रशांत ढावरे
लोणंद पोलीस स्टेशनमध्ये एका गंभीर घटनेची नोंद करण्यात आली आहे. पाडेगाव फार्म, ताम्हाणे वस्ती (ता. फलटण) येथे शेतजमिनीवरील सततच्या वादामुळे मानसिक त्रस्त झाल्याचा आरोप करत 60 वर्षीय काशिनाथ साधू ताम्हाणे यांनी विष प्राशन करून आत्महत्या केल्याची घटना समोर आली आहे.
फिर्यादी कीर्ती सागर राऊत (वय 35) यांनी दिलेल्या माहितीनुसार, आरोपी सोमनाथ ज्ञानदेव ताम्हाणे यांनी गेले पाच–सहा वर्षे त्यांच्या वडिलांच्या शेतातील बांध वारंवार फोडणे, पाणी घालणे आणि सतत त्रास देणे असे प्रकार केले. या मानसिक छळाला कंटाळून काशिनाथ ताम्हाणे यांनी 30 नोव्हेंबर रोजी दुपारी सुमारे 2.40 वाजता कीटकनाशक प्राशन करून जीव देण्याचा निर्णय घेतल्याची माहिती फिर्यादीने दिली.
घटनेची नोंद 6 डिसेंबर रोजी रात्री 9.25 वाजता करण्यात आली. घटनास्थळाला सपोनी भोसले यांनी भेट दिली असून तपास पोउपनि हेगडे यांच्याकडे देण्यात आला आहे. लोणंद पोलिसांनी आरोपीविरुद्ध गुन्हा नोंदवून पुढील तपास सुरू केला आहे.
