सोमेश्वर रिपोर्टर टीम------
सोमेश्वरनगर : प्रतिनिधी
शासनाच्या नियमानुसार चालू गाळप हंगामासाठी श्री सोमेश्वर कारखान्याचा रास्त व किफायतशीर दर (एफ.आर.पी.) ३ हजार २८५ रुपये प्रतिटन इतकी असून संचालक मंडळाने प्रथम हप्त्यापोटी ३ हजार३०० प्रतिनटन देण्याचे निश्चित केलेले आहे.
दि. १ ते १५ नोव्हेंबर या कालावधीमध्ये गळीतास आलेल्या ऊसाची प्रथम हप्त्याप्रमाणे होणारी रक्कम ऊस उत्पादक सभासदांच्या बँक खात्यामध्ये दि.२९ नोव्हेंबरला वर्ग केली असल्याची माहिती कारखान्याचे अध्यक्ष पुरुषोत्तम जगताप यांनी दिली. आजअखेर कारखान्याने ३ लाख ०१ हजार ७६० मे. टनाचे गाळप पुर्ण केले असून जिल्ह्यामध्ये उच्चांकी साखर उतारा राखत ३ लाख १४ हजार ९५० साखर पोत्यांचे उत्पादन घेतल्याचे यावेळी अध्यक्ष जगताप यांनी सांगितले.
जगताप पुढे म्हणाले की, राज्य शासनाच्या निर्णयानुसार गळीतास आलेल्या ऊसाची किमान आधारभूत किंमत (एफ.आर.पी.) १४ दिवसांमध्ये ऊस उत्पादक शेतकऱ्यांच्या खात्यावर वर्ग करणे बंधनकारक होते. त्यानुसार सुरुवातीच्या कालावधीमध्ये गळीतास आलेल्या ऊसासाठी प्रथम हप्ता देणेबाबत उशीरा निर्णय झालेमुळे सदर कालावधीमधील रकमेवर १५ टक्क्याप्रमाणे देय होणारी व्याजाची रक्कम दि.२५ नोव्हेंबर २०२५ रोजीच्या संचालक मंडळाच्या निर्णयानुसार सभासदांच्या खात्यावर वर्ग करणेचा निर्णय झालेला आहे. यामध्ये हंगाम २०२१-२०२२ मधील १ कोटी १० लाख रुपये इतकी रक्कम जानेवारी २०२३ मध्येच सभासदांचे खात्यावर वर्ग केलेली आहे. उर्वरीत हंगाम २०२२-२०२३ मधील २३ लाख ९० हजार रुपये, हंगाम २०२४-२०२५ मधील ४० लाख ६८ हजार रुपये व हंगाम २०२४-२०२५ मधील ६४ लाख ५८ हजार रुपये अशी एकूण १ कोटी २९ लाख रुपये व्याजापोटीची रक्कम ऊस उत्पादक शेतकऱ्यांच्या खात्यावर दि.०२ डिसेंबर २०२५ रोजी वर्ग केलेली आहे. राज्यामध्ये उशीरा दिलेल्या एफ.आर.पी.वरील व्याजाची रक्कम देणारा कदाचित सोमेश्वर हा एकमेव कारखाना असेल असे देखील जगताप यांनी यावेळी सांगितले.
कारखान्याने हंगाम २०२१-२०२२ मध्ये एफ.आर.पी.पेक्षा प्र.मे.टन २१८.३७ रुपयांप्रमाणे जादा २८ कोटी ९४ लाख रुपये, हंगाम २०२२-२०२३ मध्ये ४९९.५१ रुपये प्रमाणे जादा ६२ कोटी ७७ लाख रुपये, हंगाम २०२३-२०२४ मध्ये ६९७.०२ रुपये प्रमाणे जादा १०२ कोटी ११ लाख रुपये व हंगाम २०२४-२०२५ मध्ये २२६.९४ रुपये प्रमाणे जादा २५ कोटी २३ लाख रुपये इतकी रक्कम दिलेली आहे. सोमेश्वर कारखाना गेली ९ वर्षापासून एफ.आर.पी. पेक्षा जादा दर देत असून यावर्षीदेखिल जादा ऊस दराची परंपरा सोमेश्वर कारखाना कायम राखणार असल्याचे जगताप यांनी यावेळी सांगितले.
