सोमेश्वर रिपोर्टर टीम-----
सुपे : दिपक जाधव
निपाणी, नांदेड आणि धाराशिव येथील शेतकऱ्यांचे दोन ट्रॅक्टर, तीन जेसीबी मशीन भाड्याने घेऊन ते सासवड येथे नव्याने होणाऱ्या विमानतळावरील कामाकरीता लावतो, असे सांगून शेतकऱ्याशी करारनामा करून घेऊन त्या ट्रॅक्टर व जेसीबी वाहनांची विक्री करणाऱ्या टोळीचा सुपे पोलीस स्टेशनने ७७ लाखांच्या मुद्देमालासह पर्दाफाश केला आहे. सुपे पोलीस स्टेशनने केलेल्या कामागिरीचे सर्वत्र कौतुक होत आहे.
यासंदर्भात अजय संतोष चव्हाण ( रा. सरतळे ता. जावळी जि. सातारा ), दिनेश भाऊराव मोरे ( रा. इकलीबोर ता. नायगाव जि. नांदेड ), निलेश अण्णा थोरात ( रा. मोरगाव ता. बारामती जि. पुणे ) तर तुषार शहाजी शिंदे ( रा. येडशी ता. धाराशिव जि धाराशिव ) आदी चार आरोपीकडुन शेतकऱ्यांची फसवणूक करण्यात आली आहे. यासंदर्भात निलेश अण्णा थोरात या आरोपीला सुपे पोलिसांकडून अटक करण्यात आली आहे.
पोलिसांकडून मिळालेल्या माहितीनुसार, बालाजी गोविंदराव गादेवाड यांनी दिलेल्या फिर्यादीवरून गादेवाड यांच्याबरोबरच शेतकरी अनिल शिवाजी वरखडे, बाबुराव ऊर्फ आप्पाराव पांढरे यांच्याशी आरोपी यांनी शंभर रुपयाचे स्टॅम्पवर करार करण्यात आला. त्यांना तुमचे जेसीबी वाहन सासवड येथील नव्याने होणाऱ्या विमानतळाच्या कामावर लावतो असे सांगण्यात आले. विमानतळाचे काम आमच्या बी. जी. कंट्रक्शन कंपनीला मिळाले आहे. आम्ही तुमचे जेसीबी वाहन भाड्याने घेवुन प्रति महिना एक लाख रुपये प्रमाणे भाडे देणार असल्याचे सांगण्यात आले. मात्र आपली फसवणूक झाल्याचे लक्षात आल्यावर फिर्यादीने पोलीस स्टेशनंशी संपर्क साधून माहिती दिली.
त्यानुसार पोलिसांनी तपास केला असता आरोपी निलेश थोरात याने दोन ट्रॅक्टर मांडवगण फराटा ( ता. शिरुर जि. पुणे ) येथील शेतकऱ्यांना फायनांन्स कंपनीचे ट्रॅक्टर असल्याचे भासवून वाहनाची कागदपत्रे थोडया दिवासात देतो असे सांगुन ट्रॅक्टर विक्रि केल्याचे तपासात निष्पन्न झाले. तसेच आरोपी अजय संतोष चव्हाण व निलेश थोरात यांनी दिनेश भाऊराव मोरे, तुषार शिंदे यांच्याशी संगणमत करून डिसेंबर मध्ये शेतकऱ्यांकडून तीन जेसीबी मशीन विक्री करण्याच्या उद्देशाने ते सुपे ( ता. बारामती जि. पुणे ) येथे घेऊन आले असता सुपे पोलिसांनी वाहणे हस्तगत केली. तर आरोपी अजय चव्हाण, निलेश थोरात व तुषार शिंदे यांचे बी. जी. कंट्रक्शन कंपनीचे बनावट कागदपत्रे तपासात निष्पन्न झाली. त्यानुसार सुपे पोलिसांनी दोन ट्रॅक्टर, तीन जेसीबी मशीनसह ७७ लाखाच्या मुद्देमालासह थोरात यास अटक केली आहे. तर अन्य तीन आरोपीवर कळंब पोलीस स्टेशनमध्ये इतर गुन्हात अटक आहेत. यासंदर्भात अधिक तपास पोलीस उपनिरीक्षक जिनेश कोळी करीत आहेत.
जिल्हा पोलीस अधीक्षक संदीपसिंह गिल, अप्पर पोलीस अधीक्षक गणेश बिरादार, उपविभागीय पोलीस अधिकारी सुदर्शन राठोड यांच्या मार्गदर्शनाखाली सुपा पोलीस स्टेशनचे सहायक पोलीस निरीक्षक मनोजकुमार नवसरे, पोलीस उपनिरीक्षक जिनेश कोळी, पोलीस हवालदार राहुल भाग्यवंत, संदीप लोंढे, रुपेश सांळुखे, दत्ता धुमाळ, संतोष पवार, विशाल गजरे, पोलीस शिपाई किसन ताडगे, महादेव साळुंखे, तुषार जैनक, सागर वाघमोडे, निहाल वणवे, सचिन कोकणे, सचिन दरेकर, योगेश सरोदे, पियुष माळी, आदेश मवाळ आदीच्या कमेटीने आरोपीचा पर्दाफास केला.
.................................
