सोमेश्वर रिपोर्टर टीम-----
बारामती : प्रतिनिधी
बारामती विमानतळ परिसरात आज पुन्हा एकदा प्रशिक्षणासाठी वापरण्यात येणारे शिकाऊ विमान कोसळल्याची धक्कादायक घटना घडली. या अपघातामुळे बारामती विमानतळावरील शिकाऊ विमानांच्या सुरक्षेचा प्रश्न पुन्हा ऐरणीवर आला आहे. सुदैवाने या घटनेत कोणतीही जीवितहानी झाली आहे की नाही, तसेच विमानातील पायलट सुरक्षित आहेत का, याबाबतची अधिकृत माहिती अद्याप समोर आलेली नाही.
बारामती विमानतळावर खासगी वैमानिक प्रशिक्षण संस्थांमार्फत नवख्या वैमानिकांना प्रशिक्षण दिले जाते. मात्र, गेल्या काही काळात बारामती आणि परिसरात शिकाऊ विमाने कोसळण्याच्या घटनांमध्ये सातत्याने वाढ होत असल्याचे दिसून येत आहे. त्यामुळे विमानतळावरील हवाई सुरक्षा, प्रशिक्षणाची पद्धत तसेच विमानांच्या देखभालीबाबत प्रश्न उपस्थित होत आहेत.
जानेवारी महिन्यात बारामती विमानतळावर विमानाचा भीषण अपघात झाला होता. या दुर्घटनेत महाराष्ट्राचे दिवंगत उपमुख्यमंत्री अजित पवार यांच्यासह पाच जणांचा दुर्दैवी मृत्यू झाला होता. या घटनेनंतरही बारामती विमानतळ परिसरात शिकाऊ विमानांच्या अपघातांच्या घटना घडल्या आहेत. त्यावेळी सुदैवाने जीवितहानी टळली होती.
आज पुन्हा शिकाऊ विमान कोसळल्याने अपघातांची मालिका थांबण्याचे नाव घेत नसल्याचे चित्र आहे. घटनेची माहिती मिळताच विमानतळ प्रशासन, स्थानिक पोलिस तसेच आपत्कालीन यंत्रणांनी घटनास्थळी धाव घेतली. अपघात नेमका कशामुळे झाला, याचा तपास सुरू करण्यात आला आहे.
विमानातील तांत्रिक बिघाड, मानवी चूक किंवा हवामानातील प्रतिकूल परिस्थिती यापैकी कोणत्या कारणामुळे हा अपघात झाला, याबाबत अधिकृत तपासानंतरच स्पष्टता येणार आहे. दरम्यान, या घटनेतील पायलट आणि इतर व्यक्तींच्या सुरक्षिततेबाबत प्रशासनाकडून अधिकृत माहितीची प्रतीक्षा आहे.
