सोमेश्वर रिपोर्टर टीम-----
बारामती : प्रतिनिधी
बारामती तालुका पोलीस ठाण्याच्या हद्दीत एका १४ वर्षीय अल्पवयीन मुलीने इमारतीवरून उडी मारून आत्महत्या केल्याची दुर्दैवी घटना रविवारी (दि. २३) उघडकीस आली. रुई हद्दीतील स्वामी समर्थ रेसिडेन्सी इमारतीच्या परिसरात ही घटना घडली असून परिसरात हळहळ व्यक्त होत आहे.
अवनी अजित दशावतारे (वय १४) असे मृत मुलीचे नाव आहे. ती आमदार रोहित पवार यांचे स्वीय सहाय्यक अजित दशावतारे यांची कन्या होती. पोलिसांनी दिलेल्या माहितीनुसार, शनिवारी (दि. २२) रात्री सुमारे दहा वाजण्याच्या सुमारास कुटुंबीयांनी रागावल्याने अवनी घरातून निघून गेली होती. बराच वेळ शोध घेऊनही ती आढळून न आल्याने कुटुंबीय रविवारी पहाटे ३.४० वाजता बारामती तालुका पोलीस ठाण्यात दाखल झाले.
नाईट राउंड अधिकारी बापू कांबळे यांनी मुलीच्या वडिलांसह परिसरात शोध घेतला. मात्र, ती आढळून न आल्याने वडिलांच्या फिर्यादीवरून गुन्हा रजि. नं. ४०१/२०२६, कलम १३७(२) बीएनएस अंतर्गत गुन्हा दाखल करण्यात आला.
दरम्यान, शोध सुरू असताना डायल ११२ चे पोलीस हेड कॉन्स्टेबल कृष्णा कांबळे यांना रुई हद्दीतील स्वामी समर्थ बिल्डिंगच्या बाजूला एक मुलगी मयत अवस्थेत पडल्याची माहिती मिळाली. घटनास्थळी जाऊन नातेवाईकांच्या मदतीने ओळख पटवली असता तीच हरवलेली मुलगी असल्याचे निष्पन्न झाले.
घटनेची माहिती मिळताच उपविभागीय पोलीस अधिकारी चैतन्य कदम, पोलीस निरीक्षक नारायण पवार आणि महिला पोलीस उपनिरीक्षक धनश्री भगत यांनी घटनास्थळी भेट दिली. फॉरेन्सिक टीम तसेच डिटेक्शन ब्रांचच्या तीन पथकांना पाचारण करून तपास सुरू करण्यात आला.
इमारतीच्या टेरेसची पाहणी केली असता दरवाजा बाहेरून बंद असल्याचे आढळले. शिडीच्या सहाय्याने टेरेसवर प्रवेश केल्यानंतर तेथे मृत मुलीची चप्पल आढळून आली. तसेच, सीसीटीव्ही फुटेजमध्ये मुलगी रात्री ९.५८ वाजता लिफ्टने वर गेल्याचे दिसून आले. तिच्या शरीरावर खरचटल्याच्या जखमा असून डावा हात व डावा पाय फ्रॅक्चर झाल्याचे पोलिसांनी सांगितले.
प्राथमिक तपासात परिस्थितीजन्य पुराव्यांवरून मुलीने इमारतीवरून उडी मारून आत्महत्या केल्याचे प्रथमदर्शनी दिसत आहे. मृतदेह शवविच्छेदनासाठी बारामती येथील वैद्यकीय महाविद्यालयात पाठविण्यात आला असून शवविच्छेदन अहवालानंतर पुढील कायदेशीर कार्यवाही करण्यात येणार आहे. या प्रकरणाचा पुढील तपास महिला पोलीस उपनिरीक्षक धनश्री भगत करीत आहेत.
दरम्यान, घटनेनंतर आमदार रोहित पवार यांनी वैद्यकीय महाविद्यालयात येऊन घटनेची माहिती घेत दशावतारे कुटुंबीयांचे सांत्वन केले.
