बारामती-सोमेश्वर-मुरूम-साखरवाडी-सुरवडी बससेवा सुरू : मान्यवरांच्या हस्ते शुभारंभ
सोमेश्वरनगर : प्रतिनिधी
बारामती आणि फलटण या दोन तालुक्यातील अनेक गावातील प्रवाशांच्या सोयीसाठी एसटी महामंडळाने बससेवा सुरू केली आहे. एसटी कायम सुरू रहावी यासाठी ग्रामस्थांनी प्रयत्न करून जास्तीतजास्त प्रवास एसटीने करावा असे आवाहन एसटीचे पुणे जिल्हा विभाग नियंत्रक रमाकांत गायकवाड यांनी केले आहे.
मुरूम(ता. बारामती) येथे बारामती- सोमेश्वरनगर- साखरवाडी- सुरवडी या मार्गावरील नवीन एसटी बससेवेचा शुभारंभ रविवारी(दि.६) रोजी झाला त्यावेळी गायकवाड बोलत होते. यावेळी सोमेश्वर कारखान्याचे अध्यक्ष पुरुषोत्तम जगताप, माजी अध्यक्ष राजवर्धन शिंदे, दुध संघाचे संचालक कौस्तुभ चव्हाण, ज्येष्ठ ग्रामस्थ शरदराव चव्हाण, रंगराव जगताप, महादेव कदम, ग्रामपंचायत सदस्य, निलेश शिंदे, माजी सरपंच प्रदीप कणसे, महादेव निंबाळकर यांच्यासह ग्रामस्थ उपस्थित होते. ही बस बारामती डेपोतून निघून माळेगाव, पणदरे, कोऱ्हाळे, करंजेपुल चौकातून सोमेश्वर कारखाना, वाणेवाडी, मुरूम आणि फलटण तालुक्यातील मुरूम, खामगाव, साखरवाडी आणि सुरवडी पर्यंत ही बस जाणार आहे. त्याच मार्गे ही बस परत येणार आहे. या मार्गावर बसच्या दिवसभरात तीन फेऱ्या होणार आहेत. सोमेश्वरनगर, माळेगाव आणि बारामती शिक्षणासाठी येणाऱ्या विद्यार्थ्यांना, ज्येष्ठ नागरीकांना थेट गावातूनच बस उपलब्ध झाल्याने याचा मोठा फायदा होणार आहे. पहिल्यांदाच या मार्गावर बससेवा सुरू झाल्याने परीसरातील ग्रामस्थांनी समाधान व्यक्त केले आहे.
दळणवळणासाठी पुणे आणि सातारा जिल्ह्यातील नागरीकांसाठी निरा नदीवर मोठा पुल उभारण्यात आल्याने निरा आणि सांगवी वरील वाहतुकीचा ताण कमी झाला आहे. औद्योगिक क्षेत्रात काम करणाऱ्या कामगारांनाही या बसचा फायदा होणार आहे. मुरूमचे माजी सरपंच प्रदीप कणसे यांनी डेपो मॅनेजर तसेच राज्याचे उपमुख्यमंत्री अजित पवार यांच्याकडे ही बससेवा सुरु होण्यासाठी पाठपुरावा केला होता.
