कुचकामी कारभारामुळे खेडशिवापूर टोलनाक्यावर चक्का जाम
माणिक पवार
भोर : प्रतिनिधी
-फास्टटॅगच्या नावाखाली खेडशिवापूर टोल प्रशासनाकडून कुचकामी यंत्रणा राबवत असल्याने पुणे सातारा महामार्गावरील खेडशिवापूर टोलनाक्यावर दिवसभर वाहनाच्या लांब लांबच रांगा लागल्या होत्या. दुपारनंतर टोलनाक्यावर पुणे बाजूकडे जाणाऱ्या मार्गावर चक्का जाम झाल्याने प्रवाशांना नाहक तासभर ताटकळत रहावे लागल्याने संतप्त प्रतिक्रया उमटत आहे.
खेडशिवापूर ( ता. हवेली ) या टोलवरील चार लेन बंद ठेवल्याने तसेच फास्टटॅगची अपुरी यंत्रणा यामुळे सातारा बाजूकडून येणाऱ्या वाहनांची संख्या एकदम टोलवर वाढत होती. यामुळे धिम्या गतीने वाहने पास होत होती. शनिवारी आणि रविवारी या दोन दिवसांच्या सुट्ट्या लागून आल्याने पुणे मुंबईमधील पर्यटक मोठ्या प्रमाणावर बाहेर पडले होते. आज दि. २८ रोजी परतीच्या मार्गावर वाहने जात असताना पुणे बाजूकडे मोठ्या प्रमाणात वाहतूक कोंडी झाली. रविवारी सकाळपासूनच पुणे-सातारा रस्त्यावर मोठ्या प्रमाणात वाहनांची मोठी गर्दी झाली होती. टोलनाक्यावरील ढिसाळ कारभारामुळे या रांगा वाढतच गेल्या त्यामुळे एकंदरीतच सुट्टी एन्जॉय करण्यासाठी निघालेल्या पर्यटकांना वाहतूक कोंडीचा
प्रवाशांना सामना करावा लागला.
मोठा गवगवा करून केंद्र शासनाच्या आदेशानंतर फास्टटॅग यंत्रणाही या टोलनाक्यांवर लावण्यात आली आहे. मात्र आवश्यक पायाभूत सुविधांचा अभाव आणि म्यूनलची कमतरता यामुळे प्रवाशांना व वाहनचालकांना याचा नाहक त्रास सहन करावा लागत होता त्यातच फास्टटॅगवरून होणारी वादावादी यामुळे टोलनाका पास करण्यास विलंब होत आहे. यामुळे सुट्ट्यामधील वाहतूक कोंडीचा अनुभव असतानाही यासंदर्भात टोल प्रशासन ठोस नियोजन करण्यात अपयशी होत असल्याने अनेकवेळा प्रवाशांना नाहक त्रास आणि मनस्ताप सहन करावा लागत आहे. याबाबत टोल व्यवस्थापक अमित भाटिया यांच्याशी संपर्क साधला असता होऊ शकला नाही.
"मुळातच चुकीच्या ठिकाणी उभारलेल्या खेडशिवापूर टोलनाका हा पीएमआरडीच्या हद्दीच्या बाहेर हलवावा अशी टोलनाका हटाव संघर्ष कृती समिती आणि स्थानिकाची मागणी आहे. टोलनाका तातडीने बंद करण्यासाठी भोर वेल्हा आदी तालुक्यातील ग्रामपंचायतीचे ठराव घेणार आहोत'
ज्ञानेश्र्वर दारवटकर, संघर्ष समिती निमंत्रक
