सुपे : प्रतिनिधी
कोरोनाचा वाढता प्रादुर्भाव रोखण्यासाठी प्रशासनाने कठोर निर्बंध लादले आहेत. या मधुन सलुन व ब्युटी पार्लर व्यवसाईकांना वगळण्यात यावे. अन्यथा त्यांच्या कुटुंबाला मानधन मिळावे यासंदर्भातील निवेदन राज्याचे उपमुख्यमंत्री अजित पवार यांना देण्यात आले आहे.
या समाजातील तुटपुंजे नोकरदार सोडले तर संपुर्ण नाभीक समाज हा व्यवसायावर अवलंबुन आहे. त्यामुळे शासनाच्या निर्बंधामुळे दुकाने बंद ठेवावी लागत आहे. त्यामुळे तालुक्यातील नाभिक समाज उघड्यावर आला आहे. त्यांना कुटुंबाची गुजराण कशी करावी या चिंत्तेत पडला आहे. तर या बंदमुळे घरभाडे, वीजबिल, किराणा कसा भरावा यामुळे पुरता अडचणीत सापडला आहे. तसेच उत्पन्नाचे इतर कोणतेही साधन उपलब्ध नसल्याने आणि कोरोनामुळे ग्राहकांनीही सलून दुकानाकडे पाठ फिरवल्यामुळे गेले वर्षभर व्यवसायिक हवालदील झाले आहेत. गाळा भाडे, लाईट बील, घरपट्टी, पाणीपट्टी, कर्ज हप्ते, रोजचा खर्च यामुळे संपुर्ण समाज अडचणीत आला आहे.
मागील लॉकडाऊनच्या काळात अर्थीक समस्यांना कंटाळून काही सलून व्यवसाईकांनी आत्महत्यासारखे टोकाचे पाऊल उचलून आपले जीवन संपविले आहे. त्यांच्या कुटुंबानाही अर्थीक मदत मिळाली नसून त्यांनाही आर्थीक मदत मिळावी. अजुनही आत्महत्या होत आहे. सरकारकडे आर्थीक मदतीची मागणी करूनही अद्याप दखल घेण्यात आली नाही. त्यातच कोरोनाचा प्रादुर्भाव वाढल्याने सरकारने पुन्हा एकदा राज्यात कडक निर्बंध लागू केले आहेत. यामुळे सलून व ब्युटी पार्लर व्यवसाय ठप्प झाला आहे.
आमचा उदरनिर्वाहाचा पुन्हा प्रश्न निर्माण झाला आहे. सरकारने या निर्बंधातुन सलून व ब्युटी पार्लर व्यवसायाला सुट देण्यात यावी किंवा आर्थिक मदत देण्यात यावी अशी मागणी उपमुख्यमंत्री अजित पवार, बारामतीचे प्रांतधिकारी दादासाहेब कांबळे यांच्याकडे बारामती तालुका नाभिक संघटनेच्या वतीने करण्यात आली आहे.
.....................................
