सोमेश्वर रिपोर्टर टीम-------
विनोद पवार
बारामती तालुक्यातील वडगाव निंबाळकर पोलिस स्टेशनच्या हद्दीतील सोनकसवाडी गावात सहा दरोडेखोरांनी दरोडा टाकून दोन लाख 16 हजार रुपयांचा मुद्देमाल लंपास केला होता . या गुन्हेगारांवर मोक्काअंतर्गत गुन्हा दाखल करण्याबाबतचा प्रस्ताव वडगाव निंबाळकर पोलिस स्टेशन मार्फत पाठवण्यात आलेला होता . या प्रस्तावास मंजुरी मिळाली असल्याने सहा आरोपींविरुद्ध मोक्का अंतर्गत गुन्हा दाखल केला जाणार असल्याची माहीती वडगांव निंबाळकर पोलिस स्टेशनचे सहाय्यक पोलीस निरीक्षक सोमनाथ लांडे यांनी दिली.
पुणे , सातारा , सोलापुर जिल्ह्यातील चौदा गावांत दरोडा , बलात्कार , जबरी चोरी याबाबत सहा दरोडेखोरांच्या टोळीवर २६ गुन्हे दाखल झाले होते .बारामती तालुक्यातील सोनकसवाडी येथे १६ फेब्रुवारी २०२१ रोजी बंद खोलीची घरफोडी करुन तसेच आणखी एका खोलीतील व्यक्तीस चाकुचा धाक दाखवून दोन लाख १६ हजार रुपयांचे सोन चांदी व रोकडची चोरी केली होती . याबाबत वडगाव निंबाळकर पोलीस स्टेशनमध्ये दरोड्याचा गुन्हा दाखल करण्यात आला होता .
दरोड्या प्रकरणी अजय शरद भोसले रा .नेर ता . खटाव , दादा हनुमंत चव्हाण गाववडी विसापुर ; ता खटाव , विकास किरण शिंदे रा . नांदल ता फलटण जि . सातारा , रावश्या कोब्या काळे रा लासुर्णे , ता . ईंदापुर , कॅसेट उर्फ काशीनाथ उर्फ भिमराव भोसले रा . आंदरुड ता फलटण यांना अटक करुन १ लाख तेरा हजार रुपयांचा मुद्देमाल जप्त करण्यात आला होता. तर या दरोड्यातील आरोपी लखन पोपट भोसले रा .वडगांव जयराम स्वामी ता . खटाव हा फरारी आहे.
सदर आरोपींवर कार्यवाही पोलीस अधीक्षक डॉ . अभिनव देशमुख , अप्पर पोलीस अधीक्षक मिलिंद मोहिते , उपविभागीय पोलिस अधिकारी नारायण शिरगावकर , बारामती स्थानिक गुन्हे शाखेचे पद्मावत घनवट यांच्या मार्गदर्शनाखाली वडगाव निंबाळकर पोलिस स्टेशनचे सहाय्यक पोलीस निरीक्षक सोमनाथ लांडे, सपोई श्रीगणेश कवितके , योगेश शेलार , साहाय्यक फौजदार पोपट जाधव , सुर्यकांत कुलकर्णी गोरख पवार , ज्ञानेश्वर सानप , बाळासाहेब पानसरे , भाऊसाहेब मारकड ,अमोल भुजबळ , पोपट नाळे, सलमान खान ,अक्षय सिताप यांनी केली होती.
या गुन्ह्यातील आरोपी विरोधात मोक्का अंतर्गत गुन्हा दाखल होण्याबाबतचा प्रस्ताव कोल्हापूर परीक्षेत्र विशेष पोलीस महानिरीक्षक मनोज लोहीया यांकडे पाठवला होता . यानुसार याप्रस्तावास मंजुरी मिळाली असल्याने गुन्हेगारांवर मोक्का अंतर्गत गुन्हा दाखल होणार असल्याची माहीती वडगाव निंबाळकर पोलीस स्टेशनचे साहाय्यक पोलीस निरिक्षक सोमनाथ लांडे यांनी दिली . आत्तापर्यंत बारामती उपविभागाकडुन १९ टोळीतील १२५ गुन्हे गारांवर मोक्का अंतर्गत कार्यवाही करण्यात आली आहे .
