सोमेश्वर रिपोर्टर टीम--------
सोमेश्वरनगर : प्रतिनिधी
सोमेश्वर सहकारी साखर कारखान्याच्या पंचवार्षिक निवडणुकीत मंगळवारी(दि.१२) रोजी शांततेत सुमारे ८०. ८३ टक्के मतदान झाले. २५ हजार ६७७ सभासदांपैकी सुमारे २० हजार ७२९ सभासदांनी मतदानाचा हक्क बजावला असल्याची माहिती निवडणूक निर्णय अधिकारी तथा प्रांताधिकारी दादासाहेब कांबळे यांनी दिली. २० जागांसाठी उभ्या असलेल्या ४६ उमेदवारांचे भवितव्य मतदान पेटीत बंद झाले असून मतदार राजाने कोणाला कौल दिला आहे हे गुरुवारी(दि.१४) रोजी स्पष्ट होणार आहे. चार तालुक्याचे कार्यक्षेत्र असलेल्या ८३ मतदान केंद्रांवर शांततेत मतदान पार पडले. मंगळवारी सकाळपासूनच मतदानाला सुरुवात झाली होती. पदाधिकारी आणि कार्यकर्त्यांनी मतदारांना ने- आण करण्यासाठी वाहनांची व्यवस्था केली होती. राष्ट्रवादी कॉंग्रेस आणि भाजपच्या वतीने प्रमुख पदाधिकाऱ्यांनी आपल्या कार्यकर्त्यांसह मतदान केंद्रावर भेटी दिल्या. कोणताही अनुचित प्रकार न घडता मतदान शांततेत पार पडल्याने प्रशासनाचा ताण कमी झाला.
