सोमेश्वर रिपोर्टर टीम---------
मुंबई : महाराष्ट्र राज्यातील मान्यवर वृध्द साहित्यिक व कलावंत यांना मानधन योजना सन १९५४ ५५ पासून संपूर्ण राज्यात या संचालनालयामार्फत राबविली जाते. दरवर्षी १०० च्या इष्टांकानुसार कलावंतांची निवड समिती करते. मानधन मंजूर झालेल्या कलावंतांना श्रेणी निहाय (अ श्रेणी रु. ३१५०/-, ब श्रेणी रु. २७००/-, क श्रेणी रु.२२५०/-) मानधन दरमहा सांस्कृतिक कार्य संचालालयामार्फत अदा करण्यात येते.
सन २०२० २१ व २०२१-२२ या वर्षाकरीता मुंबई शहर व मुंबई उपनगर मधील साहित्यिक व कलावंत यांना मानधन मंजूर करण्यासाठी दिनांक १५ फेब्रुवारी २०२२ पर्यंत अर्ज सादर करण्याचे आवाहन संचालक, सांस्कृतिक कार्य. संचालनालय यांनी केले आहे.
ज्या व्यक्तींनी साहित्य व कला क्षेत्रात मोलाची भर घातली आहे, ज्यांचे वय ५० वर्ष पूर्ण किंवा त्यापेक्षा जास्त आहे. ज्या कलावंत/साहित्यिक यांचे उत्पन्न रु.४८०००/- पेक्षा जास्त नाही, जे कलावंत/साहित्यिक अन्य कोणत्याही शासकीय योजनेचा लाभार्थी नाही अशा साहित्यिक व कलावंतांना मानधन मिळण्यासाठी अर्ज करता येईल. अर्जाचा नमूना www.mahasanskruti.org या वेबसाईटवर तसेच सांस्कृतिक कार्य संचालनालय, जुने सचिवालय, महाराष्ट्र शासन, विस्तारभवन, म. गांधी मार्ग, मंत्रालय मुंबई ४०००३२ या कार्यालयातही उपलब्ध असून सदर अर्ज भरल्यानंतर याच कार्यालयात स्वीकारले जातील. अधिक माहितीसाठी ०२२२२८४२६३४/७० या दूरध्वनी क्रमांकावर संपर्क साधावा.
