सोमेश्वर रिपोर्टर टीम-------
सोमेश्वरनगर : प्रतिनिधी
येथील मु. सा. काकडे महाविद्यालय व महाविद्यालयाची माजी विद्यार्थी समिती यांच्या संयुक्त विद्यमाने 1972 ते 2022 या कालावधीतील माजी विद्यार्थ्यांचा स्नेहमेळावा 19 जून रोजी रविवारी सकाळी दहा वाजता महाविद्यालयातच आयोजित करण्यात आला आहे, अशी माहिती समितीचे अध्यक्ष शहाजीराव काकडे व प्राचार्य डॉ. देवीदास वायदंडे यांनी दिली. यानिमित्ताने जुन्या आठवणीना उजाळा देण्यासाठी माजी विद्यार्थी-विद्यार्थिनी उत्सुक झाले आहेत.
परिसरात उच्च शिक्षणाची कुठेही सोया नसल्याने शेतकऱ्यांच्या मुलांना शिकता यावे म्हणून सोमेश्वर कारखान्याचे संस्थापक सहकार महर्षी मुगुटराव काकडे यांनी 1972 साली या महाविद्यालयाची स्थापना केली. ग्रामीण भागाला हे महाविद्यालय वरदान ठरले. बारामती, पुरंदर, फलटण, खंडाळा, इंदापूर, दौंड अशा विविध तालुक्यातून विद्यार्थ्यांचा ओघ या महाविद्यालयाकडे येत होता. महाविद्यालयात राज्यातील दर्जेदार शिक्षक वृंद होता यामुळे राज्याला महाविद्यालयाने अनेक तंत्रज्ञ, सरकारी अधिकारी-कर्मचारी, शिक्षक, प्राध्यापक, संशोधक, पत्रकार, लेखक, कवी, प्रगतशील शेतकरी, वकील, सामाजिक कार्यकर्ते दिले आहेत. अनेक जण महाविद्यालयाच्या वसतिगृहात राहून शिकले तर अनेक मुली इंदिरा गांधी तंत्रनिकेतन मध्ये राहून शिकल्या. महाविद्यालयाच्या सुवर्ण महोत्सवी वर्षानिमित्त हे सर्व माजी विद्यार्थी स्नेहमेळाव्याच्या निमित्ताने एकत्र येणार आहेत. या दिवशी कुठल्याही पाहुण्याला निमंत्रण दिलेले नाही. संपूर्ण दिवस माजी विद्यार्थी-विद्यार्थिनी गप्पा गोष्टी, संवाद आणि सुखदुःखाची देवाण-घेवाण यातच व्यतीत करणार आहेत. याशिवाय महाविद्यालयाच्या मागील पन्नास वर्षाचे 'मुकुट' नियतकालिकाचे अंक, पन्नास वर्षातील जुने फोटो, लेख याचे प्रदर्शन भरविले जाणार आहे. विद्यार्थ्यांचाच सांस्कृतिक कार्यक्रम सादरीकरणही होणार आहे.
पहिल्यांदाच महाविद्यालयात इतक्या मोठ्या प्रमाणात मेळाव्याचे आयोजन करण्यात आले आहे. मेळाव्याच्या अध्यक्षस्थानी महाविद्यालयाचे पहिले विद्यार्थी व सोमेश्वर कारखान्याचे माजी अध्यक्ष शहाजी काकडे राहणार आहेत. महाविद्यालयाच्या वतीने शेतकरी कृती समितीचे नेते सतीश काकडे स्वागत करणार आहेत. उपस्थितांच्या स्नेहभोजनाची देखील सोय केली जाणार आहे, असेही माजी विद्यार्थी समिती सदस्य एकनाथ पवार, विजयकुमार सोरटे यांनी सांगितले.
COMMENTS