सोमेश्वर रिपोर्टर टीम--
फलटण : प्रतिनिधी
सातारा- भाजपा आमदार जयकुमार गोरे यांच्या कारला भीषण अपघात झाल्याची माहिती समोर आली आहे. फलटणजवळील पुणे पंढरपूर रस्त्यावर ही घटना घडली. फॉर्म्युनर कारवरील चालकाचं नियंत्रण सुटल्यानं गाडी ३० फूट खोल खड्ड्यात गेली. या घटनेत आमदार जयकुमार गोरे यांच्यासह इतर ४ जण जखमी झाले असून गोरे यांच्यावर पुण्यातील रुबी हॉस्पिटलमध्ये उपचार सुरू आहेत.
पहाटे ३.३० च्या सुमारास हा अपघात झाला. यावेळी कारमध्ये जयकुमार गोरे यांच्यासह ४ जण प्रवास करत होते. अपघातात जयकुमार गोरे यांच्या छातीला मार लागल्याने त्यांना पुण्यातील रुबी हॉस्पिटलला उपचारासाठी नेण्यात आले आहे. तर ४ पैकी २ जण गंभीर जखमी आहेत इतर २ किरकोळ जखमी झाले आहेत. गंभीर जखमींवर बारामती येथे हॉस्पिटलमध्ये उपचार सुरू आहेत. तर इतरांवर फलटणच्या रुग्णालयात उपचार करण्यात येत आहे.
पुण्याहून गावी दहिवडीकडे जाताना हा अपघात झाला. घटनेची माहिती मिळताच तातडीने पोलीस घटनास्थळी पोहचले. चालकाचे कारवरील नियंत्रण सुटल्याने रस्त्याशेजारील ३० फूट खोल खड्ड्यात ही कार कोसळली असं सांगण्यात येत आहे.
COMMENTS