सोमेश्वर रिपोर्टर टीम-----
परिंचे : प्रतिनिधी
श्री नाथ म्हस्कोबा व देवी जोगेश्वरी यांच्या लग्ना नंतर भाकणूक,गज गोपाळांच्या पंगती, मानाच्या पालख्या व काठ्यांची छबिण्यासह मंदिर प्रदक्षिणा असा दहा दिवसांचा श्री क्षेत्र वीर (ता.पुरंदर) येथे सुरू असलेल्या उत्सवाची सांगता मानकरी समस्त जमदाडे यांच्या हस्ते देवाला नैवेद्य दाखवून रंगाचे शिंपन करून पारंपरिक मारामारीने करण्यात आली यावेळी लाखो भाविकांच्या उपस्थितीत ' सवाई सर्जाचा' जयघोष करून मानाच्या पालख्यां व सजवलेल्या वीस गावाच्या काट्यावर फुलांची उधळण करत देवाचे मानकरी जमदाडे यांच्या हस्ते श्री नाथ मस्कोबा व देवी जोगेश्वरी यांच्या उस्तव मुर्तींवर रंगाचे शिंपण करून लाखो भाविकांच्या उपस्थितीत दहा दिवस सुरू असलेल्या यात्रेची सांगता करण्यात आली असल्याचे देवस्थान ट्रस्टचे अध्यक्ष संतोष धुमाळ यांनी सांगितले
पहाटे श्रीनाथ म्हस्कोबा व देवी जोगेश्वरी यांच्या मूर्तीची महापूजा करण्यात आली दुपारी बारा वाजता धुपारती होऊन कोडीतची मानाची पालखी दुपारी बारा वाजता प्रथम देऊळवाड्यात आली त्यापाठोपाठ कनेरी, वाई, सोनवडी, भोडवेवाडी, कसबा पेठ (पुणे) या पालख्या व सोहळ्यातील वीस गावच्या वस्त्र धारण केलेल्या मानाच्या काट्या ढोल ताशा सह अबदागिरी, निशान, छत्री, दागिदार व सर्व मानकरी मंदिरात आले. मानाच्या पालख्या व काट्यांच्या मंदिराला तीन प्रदक्षिणा पूर्ण केल्यानंतर देऊळ वाड्यातील दगडी कासवावर तात्याबा बुरुंगले, पिंटू शिंगाडे यांची भाकणूक (भविष्यवाणी) सांगण्यात आली यामध्ये यावर्षी बाजरीचे पीक जोमात येणार असून मृगाचे पाणी चार खंडात पडेल, आश्लेषा मघा नक्षत्र दोन खंडात पडेल. हत्तीचे पाणी चार खंडात पडून जनतेचे समाधान होईल. उतरा,पूर्वा, तीन खंडात पडेल, चौथ्या खंडात साधारण राहील. गाई गुरे रोगराई हटली आहे, मनुष्याच्या मागे खाता पिता आटापिटा राहिल ज्याची गादी त्याला मिळणार असल्याचे भविष्यवाणीत सांगण्यात आले.
भाकणूकी नंतर दुपारी दीड वाजता देवाचे मानकरी समस्त जमदाडे यांच्यामार्फत देवाला नैवेद्य दाखवून रंगाची शिंपन करण्यात आले.एक मंदिर प्रदक्षिणा पूर्ण करून सर्व पालख्या आपापल्या स्थळी गेल्या. यात्रेनिमित्त मंदिरास आकर्षक विद्युत रोषणाई, फुलांची सजावट,स्वच्छ पिण्याचे पाणी, लाईट व जनरेटर, दर्शनबारी, तीन ठिकाणी वाहनतळ व्यवस्था, परिसर स्वच्छता, जादा कर्मचारी, स्वयंसेवक, ट्रॅफिक पोलिस तसेच महिलांसाठी जोगेश्वरी माता कक्षाची स्थापना करण्यात आली असल्याचे देवस्थान ट्रस्टचे अध्यक्ष संतोष धुमाळ यांनी सांगितले यावेळी ट्रस्टचे विश्वस्त सचिव अभिजित धुमाळ, विश्वस्त खजिनदार अमोल धुमाळ उपस्थित होते यात्रा उत्सव पार पाडण्यासाठी ट्रस्टचे उपाध्यक्ष रवींद्र धुमाळ, विश्वस्त खजिनदार अमोल धुमाळ, ट्रस्टचे विश्वस्त हनुमंत (बाबुकाका) धुमाळ,नामदेव जाधव, राजेंद्र कुरपड , संजय कापरे, दत्तात्रय समगीर यांनी अथक परिश्रम घेतले.
