सोमेश्वर रिपोर्टर टीम------
कोरेगाव : प्रतिनिधी
वाघोली ता.कोरेगाव येथे जमिनीच्या वादातून जावयाने चुलत सासऱ्याला गोळ्या घातल्याची घटना घडली असून,सासरा सुनील शंकर भोईटे वय ४८ यांचा जागीच मृत्यु झाला आहे.
याबाबत घटनास्थळावरून मिळालेली माहिती अशी की, मयत सुनील भोईटे यांचे बंधू नामदेव भोईटे यांना दोन विवाहित मुली आहेत. मात्र त्यांना मुलगा नाही. नामदेव यांचा जावई रवी यादव याने नामदेव यांच्या हिश्याची जमीन विकली असल्याची प्राथमिक माहिती आहे. या वडिलोपार्जित जमिनीसंदर्भात न्यायालयात दावा दाखल आहे.. तो दावा सुनील भोईटे यांनी दाखल केलेला आहे. अशीही माहिती मिळाली आहे. यावरून नामदेव भोईटे यांचे जावई आणि सुनील भोईटे यांच्यात वादविवाद झाले होते. आज सायंकाळी सात वाजणेचे सुमारास नामदेव याचे जावई रवी यादव व सुनिल यादव या दोघांनी वाघोली येथे सुनील भोईटे व त्यांचा मुलगा दुचाकीवरून घराकडे निघाले असताना त्यांना वाटेत अडवून भोईटे यांच्यावर पिस्तूल रोखले. त्यावेळी भोईटे यांचा मुलगा माझ्यावडिलांना मारू नका म्हणुन हात जोडून विनवण्या करीत होता. मात्र तरीही रवी यादव याने भोईटे यांच्या पोटात व छातीत तीन गोळ्या घातल्या.
गोळ्या वर्मी लागल्याने सुनील भोईटे यांना तातडीने पिंपोडे बुद्रुकच्या ग्रामीण रुग्णालयात दाखल करण्यात आले. मात्र तत्पूर्वीच भोईटे यांचा मृत्यू झाला. रवी यादव व सुनिल यादव यांचे मुळगांव सोळशी ता.कोरेगाव हे असून ते सध्या पुणे येथे वास्तव्यास असतात. गोळीबाराची घटना घडल्यानंतर दोघेही स्वतःहून वाठार पोलीस ठाण्यात हजर झाले असल्याचे पोलिसांनी सांगितले.घटनेसंदर्भात वाठार पोलीस अधिक तपास करीत आहेत.
