सोमेश्वर रिपोर्टर टीम-----
नीरा : प्रतिनिधी
नीरा कृषी उत्पन्न बाजार समितीच्या सभापती व उपसभापतिपदाची निवड सोमवारी (२२ मे) होणार आहे. महाविकास आघाडीची निर्विवाद १८ - ० सत्ता प्रस्थापित झाली असून, पहिले सभापतीपद राष्ट्रवादी कॉंग्रेसला की काँग्रेसला मिळणार याकडे पुरंदर व बारामती तालुक्यातील शेतकऱ्यांचे लक्ष लागले आहे. इच्छुकांकडून आपापल्या पद्धतीने पक्षश्रेष्ठींकडे जोरदार पाठपुरावा सुरू केला आहे.
नीरा कृषी उत्पन्न बाजार समितीतच्या निवडणुकीत राष्ट्रवादी, काँग्रेस व ठाकरे गटाच्या महाविकास आघाडीने निर्विवाद १८ जागांवर विजय मिळवला. या बाजार समितीत पुरंदरची १०० ; तर बारामतीची ३२ गावांचे कार्यक्षेत्र आहे. पुरंदर राष्ट्रवादीचे ०५ व बारामती राष्ट्रवादीचे ०५, असे एकुण १० ; तर पुरंदर काँग्रेसचे ०८ संचालक आहेत. मावळते अध्यक्ष बारामती तालुक्यातील राष्ट्रवादीचे मुरलीधर ठोंबरे होते, तसेच मागील काळात पहिली संधी कॉंग्रेसच्या नंदुकाका जगताप यांना दिली होती. त्यामुळे यावेळी पहिल्यांदा सभापतिपदी पुरंदरमधील राष्ट्रवादी किंवा कॉंग्रेसच्या संचालकाची वर्णी लागेल, अशी शक्यता व्यक्त केली जात आहे.
मागील काळात सुरवातीला पुरंदरमधून काँग्रेसला आणि त्यानंतर राष्ट्रवादीला संधी मिळाली होती. मागील काळाप्रमाणे यावेळीही दोन्ही पक्ष सभापती व उपसभापती पद वर्षांचे वाटप करून घेतील. त्यादृष्टीने पुरंदरची दोन्ही पक्षांची नेतेमंडळी विरोधी पक्षनेते अजित पवार यांना नुकतीच भेटली आहेत. मात्र, अद्यापही पहिले सभापतिपद काँग्रेसला की राष्ट्रवादीला, ही बाब अजून जाहिर झाली नाही.
दरम्यान, पुरंदरचे सहायक निबंधक श्रीकांत श्रीखंडे यांच्या अध्यक्षतेखाली २२ मे रोजी सकाळी ११:३० वाजता सासवड येथील बाजार समितीच्या कार्यालयात सभापती व उपसभापतिपदाची निवडप्रक्रिया पार पडणार आहे.
सभापतिपदासाठी दोन्ही पक्षातून अशोक निगडे, संदीप फडतरे, देविदास कामठे, बाळासाहेब जगदाळे, वामन कामठे, शरद जगताप ही नावे आघाडीवर आहेत. उपसभापतिपदासाठी मनीषा नाझीरकर, शाहजान शेख, शरयू वाबळे या तीन महिला किंवा गणेश होले, भाऊसाहेब गुलदगड, महादेव टिळेकर, अशा अन्य प्रवर्गातील संचालक असू शकतो.
------------------------
“शनिवारी आम्ही पुन्हा अजितदादा पवारांची भेट घेऊन, पुरंदर राष्ट्रवादीच्या उमेदवाराला पहिल्यांदा सभापतीपदाची संधी मिळावी अशी मागणी करणार आहोत. अजून कुठलाही अंतिम निर्णय नाही. परंतु, महाविकास आघाडीच्या वतीने आम्ही अजितदादा पवार यांना सर्वाधिकार दिले आहेत."
माणिकराव झेंडे : अध्यक्ष पुरंदर तालुका राष्ट्रवादी कॉंग्रेस
--------------------
“आम्ही नुकतीच अजितदादांशी भेट घेतलेली आहे. अजितदादांना सर्वाधिकार आहेत. आमदार संजय जगताप त्यांच्याशी बोलतील आणि निर्णय होईल. एका पक्षाला सभापतिपद, तर दुसऱ्याला उपसभापतिपद मिळेल."
प्रदीप पोमण : अध्यक्ष पुरंदर तालुका कॉंग्रेस
