सोमेश्वर रिपोर्टर टीम------
सुपे : प्रतिनिधी
बोरकरवाडी ता बारामती येथे ऊसाची बांधणी करण्याकरिता गेलेल्या २३ वर्षीय युवकाचा ट्रॅकर पलटी झाल्याने मृत्यू झाला आहे. आकाश सुभाष बोरकर असे मृत्युमुखी पडलेल्या युवकाचे नाव आहे.
आकाश बोरकर हे त्यांच्या शेतात आज सकाळी उसाची मशागत करण्यासाठी ट्रॅक्टर घेऊन गेला होता. हा छोटा ट्रॅक्टर घेऊन उसाची बांधणी करत असताना अचानक बांधाच्या बाजूला एकेरी चाक होऊन ट्रॅक्टर पलटी झाला. त्यावेळी ट्रॅक्टर खाली आकाश सापडला. मात्र आसपास कोणीही मदतीसाठी नसल्याने त्याला ट्रॅक्टर खालून निघता आले नाही आणि त्यातच त्याचा दुर्दैवी अंत झाला.
दुपारी तीनच्या सुमारास शेतात मजुरीसाठी असलेल्या महिलांनी हा प्रकार पाहिला आणि त्यानंतर सगळीकडे धावपळ उडाली. या संदर्भातील खबर आकाशचा मोठा भाऊ अक्षय बोरकर यांनी पोलिसांना दिली. त्यानंतर पोलिसांनी अकस्मात मृत्यूची नोंद केली. या घटनेचा पुढील तपास रुपेश साळुंखे करत आहेत
