भोर ! संतोष म्हस्के !...अन् खासदार सुप्रिया सुळे धावल्या प्रवाशांच्या मदतीला : कात्रज घाटात बंद पडलेल्या शिवशाहीतील प्रवाशांना स्वतःच्या गाडीसह अन्य गाड्यांतून सुरक्षित ठिकाणी हलवले

सोमेश्वर रिपोर्टर टीम-----

भोर : प्रतिनिधी

कात्रज घाटात कडक उन्हात सांगलीकडे निघालेली एक बस रस्त्यात बंद पडली होती.मी म्हणणारे ऊन, सावलीला थांबावे तर रस्त्यावर जवळपास कुठे झाड नाही अशा उन्हाच्या काहिलीत रस्त्यावर उभ्या असलेल्या प्रवाशांच्या मदतीला दौऱ्यानिमित्त भोरच्या दिशेने निघालेल्या खासदार सुप्रिया सुळे मायेची पाखरं होत धावून गेल्या.तर स्वतःच्या गाडीसह मागून आलेल्या एसटी बसमधून सर्व प्रवाशांना खेड शिवापूर टोलनाका आणि अन्य सावली असलेल्या ठिकाणी पोहोचवले. 

       शनिवार दि.२७ दुपारी तीन ते साडेतीनच्या दरम्यान पुणे -सातारा रस्त्यावर शिंदेवाडी कात्रज घाट) परिसरात ही घटना घडली.पुण्याहून सांगलीकडे निघालेली शिवशाही बस शिंदेवाडी जवळ बंद पडली होती. त्या बस मधील सर्व प्रवाशी महिला, मुले आणि ज्येष्ठ नागरिक सुद्धा उन्हाच्या काहिलीने हैराण होत बसजवळ उभे होते.यावेळी भोर तालुका दौऱ्यावर निघालेल्या खासदार सुप्रिया सुळे यांचा ताफा त्याठिकाणी पोहोचला. त्यावेळी रस्त्यावर उभ्या प्रवाशांना पाहून सुळे यांनी गाड्या थांबवण्याची सूचना केली आणि स्वतः गाडीतून उतरून प्रवाशांची विचारपूस केली.गाडी बंद पडल्याने ते सर्वजण थांबल्याचे कळताच सुळे यांनी तातडीने हालचाल करत काही प्रवाशांना स्वतःच्या गाडीत घेतले, काहींना कार्यकर्त्यांच्या गाडीत बसवून घेण्याच्या सूचना दिल्या.  

एसटी महामंडळाने गाड्या तपासूनच सोडाव्यात - खा. सुळे

     दूरच्या प्रवासाला सोडण्यात येणारी प्रत्येक एसटी बस महामंडळाने तपासूनच पाठवायला हवी अशी अपेक्षा यावेळी सुळे यांनी व्यक्त केली. महामंडळाच्या गाड्या अचानक नादुरुस्त होण्याचे प्रमाण देखील वाढले असल्याचे प्रवासी सांगतात. राज्याच्या परीवहन मंत्री महोदयांनी याकडे वैयक्तिक लक्ष घालून प्रवाशांना नाहक त्रास होणार नाही याची काळजी घेतली पाहिजे असे त्या म्हणाल्या