सोमेश्वर रिपोर्टर टीम------
भोर : संतोष म्हस्के
दुर्गम डोंगरी भोर तालुक्यात अनेक कुटुंबे गोरगरीब असल्याने त्यांच्या पाल्यांना शैक्षणिक साहित्य मिळणे कठीण होत असते.परिणामी पाल्य शिक्षणापासून वंचित राहण्याची शक्यता असते.मात्र या पार्श्वभूमीवर भोर तालुक्यातील टिटेघर ता.भोर येथील ध्रुव प्रतिष्ठान सामाजिक बांधिलकी जपत वर्षानुवर्ष विद्यार्थ्यांना शैक्षणिक साहित्य तसेच शिष्यवृत्ती वाटप करीत आल्याने ध्रुव प्रतिष्ठानचे भोर तालुक्यातील सामाजिक कार्य मौलिक असल्याचे मत डॉ. सुरेश गोरेगावकर यांनी व्यक्त केले.
ध्रुव प्रतिष्ठान आयोजित अनाथ ,गरीब ,आदिवासी विद्यार्थी शैक्षणिक व शिष्यवृत्ती वाटप कार्यक्रमात टिटेघर येथे शनिवार दि.२४ डॉ.गोरेगावकर बोलत होते. यावेळी हिर्डोस मावळ तसेच आंबवडे खोऱ्यातील ८६७ विद्यार्थ्यांना शैक्षणिक साहित्य दप्तर, फुलस्केपवही, पेन, कंपास लागणारे सर्व दर्जेदार साहित्य कीटचे वाटप व उच्चशिक्षण घेणान्या विद्यार्थिनींना शिष्यवृत्ती वाटप केले गेले.या उपक्रमासाठी टेक्नोफोर इलेक्ट्रॉनिक्स प्रायव्हेट लिमिटेड,कमिन्स इंडिया फाउंडेशन आरती आणावकर यांनी मदत केली असल्याची माहिती ध्रुव प्रतिष्ठान अध्यक्ष राजीव केळकर यांनी दिली.यावेळी प्रा.विजय जाधव, प्रा.डॉ.रोहिदास जाधव, केंद्र प्रमुख आंजना वाडकर, सुदाम ओबळे, पंडित गोळे, मुख्याध्यापिका स्नेहल देशमाने, उपसरपंच माणिक नवघणे, तंटामुक्ती अध्यक्ष आनंदराव नवघणे, माजी सरपंच सोनबा दळवी, राहुल नवघणे, विजय वाडकर, राहुल खोपडे, योगीराज केळकर, शेखर भडाळे आदींसह मान्यवर उपस्थित होते.
