सोमेश्वर रिपोर्टर टीम-----
सोमेश्वरनगर : प्रतिनिधी
"एका नातेवाईकाकडून शरीरसुखाची मागणी होत आहे" या अत्यंत गंभीर तक्रारीसाठी गेलेल्या प्रौढ विधवा महिलेस वडगाव निंबाळकर पोलिस ठाण्यात वाईट वागणूक देण्यात आली. "समोरच्या पार्टीला तुमच्यावर तक्रार करायला लावतो मग तुमची तक्रार घेतो" अशी तंबीही देण्यात आली. अखेर अजितदादांच्या स्वीय सहायकाने सांगितल्यावरच तक्रारीचे दोन तासांचे दिव्य पार पडले.
अत्यंत गरीब घरातील महिलेने वडगाव निंबाळकर पोलिस ठाण्यात घडलेला प्रकार कथन केला. त्यांनी पोलिसांना दिलेल्या तक्रारीनुसार, "त्यांच्या शेजारी नातेवाईक राहतो. गेली काही वर्ष तो वाईट पध्दतीने डोळा ठेवून आहे. तो शरीरसुखाची मागणी करत असून त्याचे ऐकत नसल्याने मुलांवर वेगवेगळ्या केसेस करण्याची धमकी देत आहे."
दरम्यान आज महिलेने पडदे बांधून तयार केलेले बाथरूम व पक्के शौचालय ज्या दिशेला आहे त्याच दिशेला नातेवाईकाने जाणूनबुजून दरवाजा तयार केला. याबाबत वडगाव निंबाळकर पोलिसांत तात्पुरता अर्ज दिला आणि ठाणेप्रमुखांना फोन केल्यावर दोन पोलिस तातडीने पाहणीसाठी आले. पण पोलिसांनी "त्यांचे घर आहे कुठेही दरवाजा पाडतील तुम्हाला काय करायचे आहे?" अशी उलटी समज दिली असल्याचे सदर महिलेने सांगतिले.
मग महिलेने दुपारी तीन-सव्वातीनच्या दरम्यान मुलासह पोलिस ठाणे गाठले. गळ्यात माळ असलेल्या ठाणे अंमलदारांना अर्ज दिला. त्यांनी,"तुमची तक्रार घेतली जाईल. काही काळजी करू नका." असा दिलासा दिला. मात्र त्यानंतर वस्तीवर पाहणीला गेलेले दोन पोलिस आले आणि नूर बदलला. एकजण म्हणाला, "तो विषय संपला ना मघाशीच. कशाला आलाय परत?" त्यावर महिला व तिच्या मुलाने, "नोंदवून तर घ्या साहेब" अशी आर्जव केली. त्यावर पोलिसानी, "थांबा पुढच्या पार्टीला पण बोलवतो आणि तुमच्यावर केस करायला लावतो" असे सुनावले. यावर महिला व मुलाशी पोलिसांची दहा मिनिटे हुज्जत झाली. मग मुलाने रजेवर असलेल्या सहायक पोलिस निरीक्षक सचिन काळे यांना फोन केला. त्यांनीही समाधानकारक प्रतिसाद दिला आणि लगेचच ठाण्यात फोनही फिरविला. पोलिसांनी घेतो तक्रार असे सांगितले पण घेतली नाही. पुन्हा मुलाने अजित पवार यांचे स्वीय सहायक सुनिलकुमार मुसळे यांना फोन केला. मुसळेंनी गांभीर्य़ ओळखून "पोलिसांकडे फोन द्या" असे सुचविले. पण पोलिसांनी फोन घेण्यास मात्र नकार दिला. मग मुसळे यांनीच, "स्पीकरवर फोन टाका मी बोलतो" असे सुचविले. फोन स्पीकरवर टाकून पोलिसांपुढे टेबलावर ठेवला. मग पोलिस मुसळे यांच्यासमोर,"साहेब, तक्रार घेतलीय. त्यांना बसा म्हणालोय." असे सरळ झाले. यानंतरही पोलिसाने बाहेर येत "तुम्ही कशाला वर फोन करत चाललाय" असा ढोस मुलाला टाकला. मुलाने "आमच्या नेत्याकडे नाही तर कुठे जाणार" असे उत्तर दिले. दोन तासांच्या या नाट्यानंतर मुलांना बाहेर काढले आणि संबंधित महिलेस एकटीला आत बोलवले. महिला पोलिसांच्या समक्ष तक्रार घेतली. यानंतरही दोन-अडीच तास थांबा असे सुनावले. मात्र महिला परतली.
---
