सोमेश्वर रिपोर्टर टीम------
लोणी काळभोर : प्रतिनिधी
दहावीमध्ये शिकणाऱ्या मुलाने राहत्या घरात पंख्याला ओढणीच्या साह्याने गळफास घेऊन आत्महत्या केल्याचा धक्कादायक प्रकार सोमवारी (दि. १५) सकाळी हा प्रकार उघडकीस आला. कदमवाकवस्ती (ता. हवेली) येथील श्रीविहार वसाहतीत ही घटना घडली आहे.
गोविंद सतीश रूपनवर, (वय १५, रा. संभाजीनगर, कदमवाकवस्ती, ता. हवेली, मूळ रा. लातूर) असे आत्महत्या केलेल्या मुलाचे नाव आहे. या प्रकरणी लोणी काळभोर पोलिस ठाण्यात गुन्हा नोंदविण्यात आला आहे. याबाबत मिळालेल्या माहितीनुसार, गोविंदचे वडील हे चारचाकी गाडी चालवून कुटुंबाचा उदरनिर्वाह करतात. घरामध्ये आई, वडील, बहीण व गोविंद असे चौघेजण श्रीविहार वसाहतीमध्ये राहतात. एक महिन्यापूर्वीच लातूरवरून हे कुटुंब कदमवाकवस्ती येथे राहण्यासाठी आले आहे. तर गोविंदने नुकताच लोणी काळभोर येथील पृथ्वीराज कपूर मेमोरियल हायस्कूलमध्ये इयत्ता दहावीत प्रवेश घेतला होता. दरम्यान, कदमवाकवस्ती परिसरात राहात असलेल्या मामाकडे गोविंद, त्याची आई व बहीण हे तिघे
जण रविवारी (दि. १४) रात्री आठ वाजण्याच्या सुमारास जेवण करण्यासाठी गेले होते. यावेळी जेवण झाल्यानंतर रात्री गोविंद अभ्यास करायचा आहे, मी घरी जातो असे म्हणून मामाच्या घरातून निघून आला. त्यानंतर गोविंदची आई आणि त्याची बहीण या दोघीही घरी आल्या. त्यांनी वारंवार दरवाजा वाजवला, मात्र आतून कोणताही प्रतिसाद मिळाला नाही. त्यानंतर दोघीही मामा राहात असलेल्या ठिकाणी झोपण्यासाठी गेल्या. सकाळी परतल्यानंतर गोविंदने दरवाजा उघडला नाही. त्यामुळे त्यांनी एका कारागिराला बोलावून दरवाजा तोडला असता, गोविंदने राहत्या घरात गळफास घेतल्याचे निदर्शनास आले.
