सोमेश्वर रिपोर्टर टीम-----
भोर : संतोष म्हस्के
विधानसभा निवडणुकीच्या पार्श्वभूमीवर पुणे- सातारा महामार्गावरील खेड-शिवापूर टोल नाक्यावर रोख रक्कम घेऊन जाणारे वाहन राजगड पोलिसांनी सोमवार दि .२१ सायंकाळी ताब्यात घेतले.
या वाहनात नक्की किती रक्कम होती हे अजून स्पष्ट झालेले नाही; मात्र वाहनात मोठी रोख रक्कम असल्याचे समोर येत आहे. रक्कम कोणाची? कुठे चालवली होती? याबाबत राजगड पोलिसांकडून पडताळणी सुरु आहे.
पोलिसांकडून मिळालेल्या माहितीनुसार पुणे- सातारा महामार्गावरील एका वाहनातून रोख रक्कम घेऊन जाणार असल्याची माहिती राजगड पोलिसांना मिळाली होती. त्यानुसार राजगड पोलिसांनी सोमवार दुपारपासून खेड-शिवापूर टोल नाक्यावर सापळा रचला होता. सायंकाळी सहा वाजण्याच्या सुमारास एक संशयित वाहन टोल नाक्यावर आले.यावेळी या वाहनाची तपासणी केली असता त्यात रोख रक्कम असल्याचे आढळून आली.यावेळी पोलिसांनी संबंधित वाहन पोलिस चौकीला घेवून जात रोख रक्कम ताब्यात घेतली तर वाहनातील चार जणांनाही चौकशीसाठी ताब्यात घेतले आहे.सध्या खेड-शिवापूर पोलिस चौकीत वरिष्ठ पोलिस आणि महसूल अधिकारी दाखल झाले आहेत.या वाहनातील रककमेची शहनिशा करण्याचे काम सुरु आहे.या वाहनातील रक्कम एका विद्यमान आमदाराची असल्याची चर्चा सुरू आहे.
