सोमेश्वर रिपोर्टर टीम----
सोमेश्वरनगर : प्रतिनिधी
सोमेश्वर सहकारी साखर कारखाना परिसरात ऊसतोड करण्यासाठी आलेल्या कारखाना तळावरील ऊसतोडणी मजुराचा मुलगा सुनील किसन सव्वाशे (वय १३ वर्षे) हा दि. १५ रोजी नीरा डावा कालव्यात बुडाला. राष्ट्रीय आप्पाती व्यवस्थापन पथकाला दोन दिवसांच्या शोध मोहिमेनंतर सुनीलचा मृतदेह निरा डाव्या कालव्यात शोधण्यात यश आले आहे.
सुनील हा रविवार (दि. १५) रोजी सकाळी अकराच्या दरम्यान आपल्या मित्रांसोबत ऊसतोडणी कामगार वसाहत शेजारी निरा डाव्या कालव्यावर पोहण्यासाठी आला होता. त्याने कालव्यात पोहण्यासाठी ऊडी मारली त्यानंतर तो पाण्यातून वर आलाच नाही. रविवार पासून स्थानिकांनी त्याचा शोध घेण्याचा प्रयत्न केला मात्र त्याचा शोध लागला नाही. सोमवार (दि. १६) रोजी दुपारी एकच्या दरम्यान पुणे येथील आपत्ती व्यवस्थापनची टीम सोमेश्वर कारखाना परिसरात दाखल झाल्यानंतर त्यांनी निरा डावा कालवा परिसरातील मळशी लोखंडी पूल येथे त्याचा शोध घेतला. पाच ते सहा तासाहून अधिक वेळ प्रयत्न करूनही त्यांना बुडालेल्या सुनीलचा तपास लागलेला नाही.
आपत्ती व्यवस्थापन टीम ने पुन्हा दुसऱ्या दिवशी शोध मोहीम सुरू केली. आज दि. १७ रोजी दुपारी सुनीलचा मृतदेह सोमेश्वर कारखान्याच्या मागील बाजूस निरा डाव्या कालव्यात शोधण्यात टीमला यश आले.
राष्ट्रीय आपत्ती व्यवस्थापन टीमचे अधिकारी सुशीलकुमार सेठी यांच्यासह पथकातील २० कर्मचाऱ्यांनी ही शोधमोहीम घेतली. वडगाव निंबाळकर पोलीस व बारामती महसूल विभागाने त्यांना मदत केली.
