सोमेश्वर रिपोर्टर टीम------
भोर : संतोष म्हस्के
महाराष्ट्रासह इतर राज्यातील लाखो भाविकांचे श्रद्धास्थान असलेल्या मांढरदेवी ता.वाई येथील श्री काळुबाई देवीची यात्रा १२, १३ व १४ जानेवारीला भरणार असून यात्रा उत्सव एक महिन्यावर येऊन ठेपला आहे.यात्रा उत्सवाची तयारी सुरू झालेली आहे अशी माहिती मांढरदेव देवस्थान विश्वस्त मंडळाकडून देण्यात आली.
राज्यभरातील भाविकांना नवसाला पावणारी देवी अशी मोठी ख्याती असलेल्या श्री काळुबाई देवीची यात्रा दरवर्षी पौष महिन्यात पौष पौर्णिमेला भरते.यावर्षी यावर्षी १२ जानेवारीला देवीचा जागर चालू होऊन मुख्य दिवस १३ जानेवारी असणार आहे.देवीच्या यात्रेसाठी कापूरहोळ- भोर- आंबाडे मार्गावरून मोठ्या प्रमाणावर आंबाडखिंड घाटमार्गे भाविकांची गर्दी होत असते.मात्र यंदा रस्त्याच्या नूतनीकरणाचे काम सुरू असल्याने वाहतुकीचा खोळंबा होण्याची शक्यता वाहन चालकांकडून वर्तवली जात आहे.या पार्श्वभूमीवर यावर्षीच्या यात्रेला मागील वर्षाच्या तुलनेत भाविकांची गर्दी कमी होण्याचे चित्र आहे. संबंधित विभागाने मांढरदेवी यात्रा काळासाठी सुरू असलेल्या रस्त्याचे काम पूर्ण करून दिले तरच भाविक भक्तांना आंबाडखिंड घाटमार्गे काळुबाई देवीला जाणे सोयस्कर ठरणार आहे.अन्यथा भाविकांना शेकडो किलोमीटर लांब पल्यावरून वाईमार्गे देवीच्या यात्रेला आर्थिक नुकसान सहन करून जावे लागणार आहे.
काळुबाई देवी यात्रेसाठी भोर- आंबाडखिंड घाट खुला करणार
सध्या भोर -आंबाडे-आंबाडखिंड घाट रस्त्याचे नूतनीकरणाचे काम सुरू ३१ डिसेंबर पर्यंत हे काम सुरू राहणार आहे.एक महिन्यावर येऊ घातलेल्या मांढरदेवी येथील श्री काळुबाई देवीच्या यात्रेसाठी ३१ डिसेंबर पासून वाहतुकीस रस्ता पूर्णपणे खुला करण्यात येणार असल्याचे सार्वजनिक बांधकाम विभाग भोर उपविभागीय अभियंता राजेसाहेब आगळे यांनी सांगितले.
---------------------
मांढरदेव देवस्थानकडून यात्रा नियोजन सुरू
श्री काळुबाई देवीची यात्रा जवळ आल्याने मांढरदेव देवस्थानकाकडून यात्रेकरिता नियोजन सुरू केले आहे.यात्रेत येणाऱ्या भाविकांची कोणत्याही प्रकारची गैरसोय होणार नाही यासाठी खबरदारी घेतली जाणार आहे तर भोर,वाई,खंडाळा,सातारा प्रशासनाच्या यात्रा काळातील नियोजनासाठी पुढील आठवड्यापासून मीटिंग सुरू होणार आहेत असे विश्वस्त मंडळाकडून सांगण्यात आले.
