सोमेश्वर रिपोर्टर टीम-----
दहिवडी : प्रतिनिधी
मार्डी (ता. माण) येथील शंभूराज शशिकांत राजमाने वय वर्ष ९, या इयत्ता तिसरीत शिक्षण घेत असलेल्या मुलाचा शेततळ्यामध्ये बुडून मृत्यू झाल्याची दुर्दैवी घटना घडली.
दि. १५ रोजी ही घटना घडली. शंभूराज हा गावातच एका ठिकाणी संगीत शिकण्यासाठी जात होता.
मंगळवारी दुपारी तीनच्या सुमारास सायकल घेऊन तो शिकवणीला म्हणून गेला होता. रात्री उशिरापर्यंत तो घरी आला नाही, त्यामुळे त्याच्या पालकांनी क्लास शिक्षक व इतर मुलांकडे चौकशी केली असता तो शिकवणीला आला नाही, असे सांगण्यात आले. शोधाशोध केल्यानंतर क्लास शिक्षक यांच्या घरामागे असणाऱ्या शेततळ्याशेजारी शंभूराजची सायकल व चप्पल पडल्याचे दिसून आले. त्यानंतर शंभूराजचा शोध घेतला असता त्याचा मृतदेह शेततळ्यात आढळून आला. या घटनेची माहिती मिळताच पोलिस घटनास्थळी दाखल झाले. शवविच्छेदनानंतर मृतदेह नातेवाइकांच्या ताब्यात देण्यात आला आहे. अधिक तपास सहायक फौजदार एम. आर. सांगे करत आहेत.
