सोमेश्वर रिपोर्टर टीम------
बारामती : प्रतिनिधी
करंजेपूल (ता. बारामती) ग्रामपंचायतीअंतर्गत शेंडकरवाडी येथील भरत तात्याबा शेंडकर (वय ३५) या ट्रॅक्टरमालक शेतकऱ्यास किरकोळ कारणावरून बारामतीमध्ये सहा जणांच्या टोळीने पाठलाग करत करत बेदम मारहाण केली आहे. यात शेंडकर यांचा पाय मोडला असून त्यावर शस्त्रक्रिया करावी लागली. याबाबत बारामती शहर पोलिसांकडे वारंवार हेलपाटे घालूनही पूर्ण असूनही एकोणीस झाले दिवस आरोपी मोकाट आहेत. जखमीच्या आई पार्वती शेंडकर यांनी शनिवारी (ता. 10) पोलिस ठाण्यासमोर धरणे धरल्यावरही पोलिसांना घाम फुटला नाही. यामुळे अखेर पार्वती शेंडकर यांनी एसपी व डिवायएसपी यांना उपोषणाचा इशारा निवेदनाद्वारे आज दिला आहे. दरम्यान आकाश बोराटे या आरोपीस पोलिसांनी अटक केल्याचे समजत आहे. इतर आरोपी मात्र अजुनही फरार आहेत.
भरत शेंडकर हे लासुर्णेहून शेतकाम केल्यावर ट्रॅक्टर (एमएच ४२ एएक्स १३३४) घेऊन परतत होते. दरम्यान रात्री आठच्या सुमारास बारामतीच्या मोतीबाग चौकात उभ्या असलेल्या युनिकॉर्न या चालकविरहित दुचाकीला ट्रॅक्टरमागे अडकवलेल्या अवजाराचा किरकोळ धक्का लागला. यावर दुचाकीचालक आदेश जाधव याने शेंडकर यांना मारहाण करत मित्रांना फोन करून बोलवून घेतले. निक्सॉन (एमएच ४५ एएल ०२४२) गाडीतून आणखी पाचजण आले. त्यांनीही शेंडकर बेदम मारहाण केली. त्यातील आकाश बोराटे याने लोखंडी रॉडने गुडघ्याखाली घाव घातला. यानंतर शेंडकर जिवाच्या भितीने ट्रॅक्टरसह पळाले. मात्र त्यांचा पाठलाग करत करत माळेगाव येथील पेट्रोल पंपावर पुन्हा अडविले. तिथेही पुन्हा बेदम मारहाण करण्यात आली. रक्तबंबाळ झालेल्या शेंडकर यांना माळेगावचे संतोष सणस, रणजित तावरे यांच्या मदतीने हॉस्पिटलमध्ये दाखल करण्यात आले.
याप्रकरणी बारामती पोलिसांनी उशिरा म्हणजे 2 मे रोजी आदेश बाळकृष्ण जाधव (रा. गुणवरे ता. फलटण), निखिल नंदकुमार घोरपडे (रा. पिंपळी ता. बारामती), आकाश शंकर बोराटे (रा. माळेगाव ता. बारामती), सूरज शिंदे (रा. डोर्लेवाडी ता. बारामती), अनिल मेहेर (पत्ता माहिती नाही) व आणखी एक अनोळखी इसमाविरूद्द मारहाणीचा गुन्हा दाखल करण्यात आला आहे. शेंडकर यांच्या नातेवाईकांनी वारंवार हेलपाटे मारूनही एकोणीस दिवस पोलिसांनी काहीही दखल घेतली नाही. शेंडकर यांना शस्त्रक्रिया करून घरी आणल्यावर त्यांची आई पार्वती शेंडकर यांनी शनिवारी दुपारनंतर शहर पोलिस ठाण्यासमोर धरणे धरले. पोलिसांनी दोन दिवसांत कार्यवाही करण्याचे आश्वासन दिले. यानंतरही आरोपी मोकाट असल्याने मुलाच्या न्यायासाठी आईने पुन्हा एसपी , डीवायएसपी आणि शहर पोलिस ठाण्यात निवेदन देऊन उपोषणाचा इशारा दिला आहे.
या घटनेने बारामती पोलिसांच्या कार्यक्षमेतवर प्रश्नचिन्ह उभे राहिला आहे.
पार्वती शेंडकर म्हणाल्या, सगळे नुकसान दुप्पट भरून देऊ पण मारू नका असे मुलगा हातापाया पडून म्हणत असताना आरोपीनी माळेगावपर्यंत पाठलाग करत मारहाण केली. भरतचा पाय मोडला. त्याच रात्री आरोपी पोलिस ठाण्यात हजर होते, नंतर दवाखान्यातही पोलिसांदेखत आरोपी आले होते तरीही अटक केली नाही.
पाठपुरावा केल्यावर दवाखान्यात येऊन पोलिसांनी एफआयआर केली. पोलीस आम्हालाच आरोपीची नावे, नंबर मागत आहेत. आता उपोषण तर करणारच आहे पण पालकमंत्री अजितदादा पवार यांची न्यायासाठी भेट घेणार आहे. बारामतीला बीड सारखे बनवायचे आहे काय?
