सोमेश्वर रिपोर्टर टीम------
भोर : संतोष म्हस्के
पुणे-सातारा महामार्गावरील खुटवडवस्ती, कामथडी ता. भोर येथे पाण्याची मोटर चालू करताना विजेचा धक्का लागून ३६ वर्षीय युवकाचा मृत्यू झाल्याची दुर्दैवी घटना घडली आहे. राजेंद्र चंद्रकांत खुटवड असे मयत झालेल्या युवकाचे नाव आहे. ही घटना आज बुधवार दि. १४ मे रोजी दुपारी घडली.
याबाबत अशोक ज्ञानोबा खुटवड (वय ३६ वर्ष, दोघेही रा. खुटवड वस्ती, कामथडी ता. भोर यांनी राजगड पोलिसांना माहिती दिली. पोलिसांनी दिलेल्या माहितीनुसार खुटवडवस्ती, कामथडी (ता. भोर) येथील राजेंद्र खुटवड हा युवक बुधवार दि.१४ दुपारी अडीच वाजण्याच्या सुमारास नेहमी प्रमाणे आपल्या राहत्या घरा समोरील पाण्याची मोटार चालु करण्यासाठी गेला होता.मोटर चालू करताना विजेचा तीव्र धक्का लागल्याने हा युवक जागीच बेशुध्द पडला.यानंतर नातेवाईकांनी तातडीने त्याला नसरापूर येथील खासगी दवाखान्यात नेले. मात्र त्याचा उपचारादरम्यान मृत्यू झाला. घटनेची माहिती मिळताच राजगड पोलिसांनी मृतदेह ताब्यात घेऊन भोर येथील उपजिल्हा रुग्णालयात पाठवला. सदर घटनेबाबतचा अधिक तपास राजगड पोलीस ठाण्याचे पोलीस निरीक्षक राजेश गवळी यांच्या मार्गदर्शनाखाली सुरू आहे.
