सोमेश्वर रिपोर्टर टीम------
शिरवळ : प्रतिनिधी
खंडाळा तालुक्यातील शिरवळ येथील दत्तनगर येथील निर्मनुष्य असलेल्या नीरा देवघर कॅनॉलजवळील पायवाटेवर पत्नीबरोबर असलेल्या प्रेम संबंधास अडथळा ठरत असल्याच्या कारणावरून परप्रांतीय पतीचा प्रियकराने जेवणाच्या डब्याने वार करीत कॅनॉलमध्ये ढकलून देत खून केल्याची घटना उघडकीस आणली आहे.
खून करणाऱ्या प्रियकराचा शिरवळ पोलीसांनी अवघ्या १ तासांमध्ये पर्दाफाश करीत प्रियकराला बेड्या ठोकल्या आहेत. यामध्ये प्रदिप रामाश्रय सिंग (वय ३१ वर्ष सध्या रा.दत्तनगर, शिरवळ ता.खंडाळा मूळ रा.जिगरसंडी ता.जहानागंज जिल्हा आजमगढ राज्य उत्तरप्रदेश) असे खून झालेल्या युवकाचे नाव आहे. याप्रकरणी प्रदिप सिंग याचा नातेवाईक असलेल्या प्रियकर जितेंद्रकुमार राजमन गौतम(वय २०,सध्या रा.दत्तनगर, शिरवळ ता.खंडाळा मूळ रा.दुर्गोलीकला, बदलापूर, जिल्हा जौनपूर, राज्य उत्तरप्रदेश) असे शिरवळ पोलीसांनी अटक केलेल्या प्रियकराचे नाव आहे.हि घटना सोमवार दि.१९ मे रोजी रात्री ९ ते ९.३० च्या दरम्यान घडली आहे. याबाबत घटनास्थळावरून व पोलीसांनी दिलेली अधिक माहिती अशी कि,दत्तनगर,शिरवळ येथील प्रदिप सिंग व जितेंद्रकुमार गौतम हे एकत्र राहण्याकरिता असून प्रदिप सिंग हा चौपाळा येथील एका अपार्टमेंटमध्ये एका फर्निचरच्या दुकानात कामासाठी आहे.दरम्यान,१९ मे रोजी प्रदिप सिंग हा कामावरून सुटल्यानंतर दुकान मालकाची दुचाकी घेत जितेंद्रकुमार गौतम याच्याबरोबर पंढरपूर फाटा येथील एका वाईन्स शॉपवरून दारू विकत घेत दोघांनी प्रदिप सिंग हा ज्याठिकाणी काम करत आहे त्याठिकाणी मध्यप्राशन करीत दोघेही ९ ते ९.३० च्या दरम्यान घरी जाण्यासाठी शिरवळ येथील दत्तनगर येथील निर्मनुष्य असलेल्या नीरा देवघर कॅनॉलजवळील पायवाटेवर जात असताना जितेंद्रकुमार गौतम याने प्रदिप सिंग याच्या पत्नीबरोबर असलेल्या प्रेम संबंधावरून वादविवाद घालून प्रेम संबंधास अडथळा ठरत असल्याच्या रागातून प्रदिप सिंग याच्या डोक्यात स्टीलच्या डब्याने मारहाण करून त्यास नीरा देवघर कॅनॉलमध्ये ढकलून देत खून केला.विशेष म्हणजे ढकलून दिल्यानंतर जितेंद्रकुमार गौतम हा घटनास्थळी साधारण १५ ते २० मिनिटे थांबून होता.यावेळी जितेंद्रकुमार गौतम याने प्रदिप सिंग याचा व स्वतःचा मोबाईल घटनास्थळापासून काही अंतरावर फोडून देत राहत असलेल्या ठिकाणी जात नातेवाईकांना आम्हाला दुचाकीवरून आलेल्या तिघांनी लुटल्याची व मी पळून आल्याचे चित्रपटाला शोभेल असे कथानक रंगवित घटनास्थळी नातेवाइकांसमवेत आला.यावेळी या घटनेची माहिती मिळताच घटनास्थळी तातडीने फलटण पोलीस उपविभागीय अधिकारी राहुल धस,शिरवळ पोलीस स्टेशनचे प्रभारी पोलीस निरीक्षक सुनील शेळके,सहाय्यक पोलीस निरीक्षक महादेव शिद,नयना कामथे,पोलीस अंमलदार अंकुश गार्डी,सचिन वीर,सुरेश मोरे,अरविंद बा-हाळे,अजित बो-हाटे, मंगेश मोझर, भाऊसाहेब दिघे,विजय शिंदे तसेच सातारा येथील स्थानिक गुन्हे अन्वेषन विभागाच्या अधिकारी,कर्मचारी यांनी भेट देऊन पाहणी केली.याप्रसंगी घटनास्थळी सातारा येथील ठसे तज्ञ व रिओ या श्वानाला पाचारण करण्यात आले होते.यावेळी शिरवळ येथील प्राथमिक आरोग्य केंद्रामध्ये मृतदेहाचे शवविच्छेदन करण्यात येऊन मृतदेह नातेवाइकांच्या ताब्यात देण्यात आला.या घटनेची ज्ञानदीप रामाश्रय याने शिरवळ पोलीस स्टेशनला फिर्याद दिली असून सहाय्यक पोलीस निरीक्षक महादेव शिद हे अधिक तपास करीत आहे. चौकट-अन कथानकाचा शिरवळ पोलीसांनी १ तासामध्ये केला पर्दाफाश शिरवळ येथे एका खाजगी रुग्णालयामध्ये परप्रांतीय युवकाचा संशयास्पदरित्या मृत्यू झाल्याची माहिती मिळताच घटनास्थळी व रुग्णालयात शिरवळ पोलीसांनी धाव घेतली.यावेळी शिरवळ पोलीस स्टेशनचे सहाय्यक पोलीस निरीक्षक महादेव शिद,पोलीस अंमलदार अरविंद बा-हाळे आणि मृत झालेल्या प्रदिप सिंग याच्याबरोबर असलेल्या जितेंद्रकुमार गौतम याच्याकडून माहिती घेत असताना जितेंद्रकुमार गौतम याच्या बोलण्यातील विसंगती व परिस्थितीवरून काहीतरी वेगळे घडल्याची शक्यता लक्षात घेऊन घटनास्थळावरील तांत्रिक विश्लेषण तसेच सुतावरून स्वर्ग गाठत कोणताही पुरावा नसताना जितेंद्रकुमार गौतम याला बोलते केले असता लुटमारीचा चित्रपटाला शोभेल असा कथानक सांगणा-या व नातेवाईकांच्या गळ्यात गळा घालून हंबरडा फोडणाऱ्या जितेंद्रकुमार गौतम याच्या कथानकाचा पर्दाफाश करीत मुसक्या शिरवळ पोलीसांनी आवळत खूनप्रकरणी अटक केली.
