सोमेश्वर रिपोर्टर टीम-----
सोमेश्वरनगर - प्रतिनिधी
एकीकडे तरुण मतदानाला जायला टाळाटाळ करतात मात्र दुसरीकडे वय ९४ वर्षे असूनही बारामती तालुक्यातील सदोबाचीवाडी येथील ज्येष्ठ नागरिक पर्बतराव सखाराम होळकर यांनी अद्याप एकदाही मतदानाचा हक्क टाळला नाही. पर्बतराव होळकर हे एक जागरूक ज्येष्ठ नागरिक म्हणून पंचक्रोशीत प्रसिद्ध आहेत. बारामती तालुक्यात विधानसभेची पोटनिवडणूक पार पडत असताना त्यांनी रणरणत्या उन्हात घरी बसण्याऐवजी मतदान करत आपला राष्ट्रीय हक्क बजावला.
ते म्हणाले की आपल्या देशात लोकशाही टिकवायची असेल तर सर्वांनी आपला मतदानाचा पवित्र हक्क बजावला पाहिजे. एकीकडे तरुण वर्ग मतदानासाठी टाळाटाळ करताना दिसत असताना, दुसरीकडे बारामती तालुक्यातील सदोबाचीवाडी येथील ९४ वर्षीय ज्येष्ठ नागरिक पर्बतराव सखाराम होळकर यांनी मतदानाबाबतचा आपला उत्साह आणि कर्तव्यनिष्ठा कायम ठेवत सर्वांसमोर एक आदर्श निर्माण केला आहे. पर्बतराव होळकर यांनी आयुष्यातील एकही मतदान चुकवलेले नसून, प्रत्येक निवडणुकीत ते आवर्जून सहभाग नोंदवतात. यंदा बारामती तालुक्यात पार पडणाऱ्या विधानसभेच्या पोटनिवडणुकीतही त्यांनी आपली परंपरा कायम ठेवली. प्रखर उन्हाची पर्वा न करता त्यांनी मतदान केंद्रावर जाऊन आपला हक्क बजावला.
पंचक्रोशीत एक जागरूक आणि जबाबदार नागरिक म्हणून त्यांची ओळख आहे. त्यांच्या या कृतीमुळे गावातील तरुणांसह नागरिकांमध्येही सकारात्मक संदेश गेला असून, मतदानाबाबत जागरूकता निर्माण झाली आहे.
यावेळी बोलताना पर्बतराव होळकर म्हणाले, “लोकशाही बळकट ठेवायची असेल तर प्रत्येक नागरिकाने मतदानाचा पवित्र हक्क बजावला पाहिजे. मतदान करणे ही केवळ जबाबदारी नसून ती आपली देशाप्रती असलेली बांधिलकी आहे.”
त्यांच्या या प्रेरणादायी कृतीमुळे अनेकांना मतदानासाठी प्रोत्साहन मिळत असून, “वय हा फक्त आकडा आहे, इच्छाशक्ती असेल तर काहीही शक्य आहे,” याची जाणीव पुन्हा एकदा झाली आहे.
