सोमेश्वर रिपोर्टर टीम-----
बारामती : प्रतिनिधी
भारतीय साखर उद्योगातील अत्यंत प्रतिष्ठेची आणि अग्रगण्य मानली जाणारी संस्था ‘द शुगर टेक्नॉलॉजिस्ट्स असोसिएशन ऑफ इंडिया’, नवी दिल्लीच्या कौन्सिल सदस्यपदी वसंतदादा शुगर इन्स्टिट्यूटच्या साखर अभियांत्रिकी व अपारंपरिक ऊर्जा विभागाचे प्रमुख व तांत्रिक सल्लागार श्री. राजेंद्र चांदगुडे यांची बिनविरोध निवड झाली आहे.
मध्य प्रदेश, छत्तीसगड, महाराष्ट्र, गोवा आणि राजस्थान या पाच राज्यांच्या विस्तृत कार्यक्षेत्रातून झालेली ही निवड त्यांच्या प्रदीर्घ अनुभवावर आणि तांत्रिक कौशल्यावर शिक्कामोर्तब करणारी आहे. श्री. चांदगुडे यांचे कार्य केवळ देशांतर्गत मर्यादित नसून त्यांनी जागतिक नकाशावर भारतीय साखर तंत्रज्ञानाचा नावलौकिक वाढवला आहे. त्यांच्या कारकिर्दीतील काही महत्त्वाचे पैलू पुढीलप्रमाणे आहेत : त्यांनी आतापर्यंत ३० हून अधिक देशांचा दौरा करून तेथे तांत्रिक सल्लागार म्हणून सेवा दिली आहे. परदेशातील साखर कारखान्यांतील अभियंते व तांत्रिक कर्मचाऱ्यांसाठी त्यांनी विशेष प्रशिक्षण कार्यक्रम राबवले आहेत. आंतरराष्ट्रीय परिषदांमध्ये त्यांनी सादर केलेले शोधनिबंध साखर उद्योगाला नवी दिशा देणारे ठरले आहेत. नामांकित राष्ट्रीय व आंतरराष्ट्रीय जर्नल्समध्ये त्यांचे ५० हून अधिक संशोधनपर लेख प्रसिद्ध झाले आहेत. तांत्रिक ज्ञान सर्वसामान्यांपर्यंत पोहोचावे यासाठी त्यांनी मराठी भाषेत एक पुस्तक लिहिले असून ते अत्यंत मोलाचे आहे.
गेल्या ३० वर्षांपासून साखर उद्योगाशी निगडित असलेल्या श्री. चांदगुडे यांनी तब्बल २० वर्षे ‘वसंतदादा शुगर इन्स्टिट्यूट’ सारख्या संस्थेत काम केले आहे. त्यांच्या या समर्पित सेवेची दखल घेत ‘डेक्कन शुगर टेक्नॉलॉजिस्ट्स असोसिएशन’ तर्फे त्यांना ‘लाइफटाइम अचिव्हमेंट अवॉर्ड’ देऊन गौरविण्यात आले आहे.
१९२५ मध्ये स्थापन झालेली ‘द शुगर टेक्नॉलॉजिस्ट्स असोसिएशन ऑफ इंडिया’, नवी दिल्ली, साखर तंत्रज्ञान आणि संशोधनाच्या क्षेत्रात गेल्या नऊ दशकांपासून कार्यरत आहे. या संस्थेची ८८ वी वार्षिक सभा आणि पहिली कौन्सिल मीटिंग दि. १९ ऑगस्ट रोजी गोवा येथे होणार आहे. या बैठकीत श्री. चांदगुडे अधिकृतपणे आपला पदभार स्वीकारणार आहेत. यांची निवड झाल्यामुळे साखर कारखानदारीतील तांत्रिक अडचणी सोडवण्यास आणि आधुनिक नवोपक्रमांना गती मिळण्यास मोठी मदत होणार आहे.
